ABŞ AZƏRBAYCANIN İQTİSADİ SAHƏDƏ UĞURLARINI VƏ İNSTİTUSİONAL SAHƏDƏ HƏYATA KEÇİRDİYİ İSLAHATLARI DƏSTƏKLƏYİR
AZƏRTAC xəbər verir ki, aprelin 22-də Azərbaycanın xarici işlər naziri Elmar Məmmədyarov ABŞ dövlət katibinin iqtisadiyyat, energetika və kənd təsərrüfatı məsələləri üzrə müavini Ruben Cefri ilə görüşmüşdür.
ABŞ rəsmisi ölkələrimiz arasında sürətlə inkişaf edən ikitərəfli münasibətləri yüksək qiymətləndirmiş, Birləşmiş Ştatların Azərbaycanın iqtisadi sahədə uğurlarını, institusional sahədə həyata keçirdiyi islahatları dəstəklədiyini diqqətə çatdırmışdır.
Nazir E.Məmmədyarov ABŞ-ın Azərbaycana dəstəyini, xüsusilə Bakı-Tbilisi-Ceyhan layihəsinin gerçəkləşməsində rolunu vurğulamış, Azərbaycanın enerji daşıyıcılarının Avropa bazarlarına çıxarılmasında da bu dəstəyi davam etdirməsini müsbət dəyərləndirmişdir.
R.Cefri enerji diversifikasiyasının hazırda mühüm strateji əhəmiyyət daşıdığını və ABŞ-ın da bu məsələdə maraqlı olduğunu bildirmişdir.
Görüşdə Azərbaycan iqtisadiyyatında diversifikasiyanın vacibliyi vurğulanmış, qeyri-neft sektorunun inkişaf etdirilməsi, investisiya mühitinin yaxşılaşdırılması, ölkəmizə yüksək texnologiyaların gətirilməsi, aqro-biznes, turizm, ekologiya sahələrində birgə işbirliyinin qurulması barədə geniş fikir mübadiləsi aparılmış, bu məsələlərin ABŞ-Azərbaycan İqtisadi Tərəfdaşlıq Komissiyasında müzakirəsinin, hər iki tərəfin mövcud iqtisadi imkanları barədə biznes dairələrinin daim məlumatlandırılmasının zəruriliyi qeyd edilmişdir.
Bölmənin digər xəbərləri
