ABŞ BİRLƏŞMİŞ MİLLƏTLƏR TƏŞKİLATI İQAMƏTGAHININ ƏSASLI TƏMİRİNİ BOYKOT EDİR
Binanın əsaslı təmiri proqramına cavabdeh olan BMT nümayəndəsi Frits Röyter məsələyə aydınlıq gətirərək demişdir: “ABŞ bu layihənin maliyyələşdirilməsi ilə məşğul olan komitənin yeganə üzvüdür ki, işlərin davam etdirilməsi üçün 100 milyon dollar məbləğində yeni tranşın köçürülməsini indiyədək təsdiqləməmişdir”.
ABŞ-ın BMT-dəki səfiri Con Bolton bildirmişdir ki, onun ölkəsi uzağı 23,5 milyon dollar ayırmağa hazırdır, çünki binanın təmiri planını BMT Baş Məclisi hələ də təsdiqləməmişdir. O demişdir: “Zənnimizcə, 23,5 milyon dollar böyük məbləğdir və Baş Məclis bu planın xüsusilə mühüm məsələlərinə dair qərar çıxaranadək xeyli müddətə kifayət edəcəkdir”.
Lakin Frits Röyter vurğulamışdır ki, ləngitmənin hər bir günü BMT-yə 225 min dollara başa gəlir. Lazımi məbləğin ayrılması nəzərdə tutulduğu gündən – aprelin 1-dən bütün layihənin dəyəri 3,8 milyon dollar artmışdır. Səfirin sözlərinə görə, maliyyələşdirmə planı yaxın vaxtlarda təsdiqlənməsə, onun həyata keçirilməsi müddəti və ona çəkilən xərclər kəskin surətdə arta bilər.
1949-51-ci illərdə tikilən BMT iqamətgahının əsaslı təmiri üçün ümumi xərclər 1,6 milyard dollar təşkil edir. Bu məbləğin 22 faizini ABŞ ödəməlidir.
BMT nümayəndələri bildirirlər ki, bina bərbad vəziyyətdədir, çünki tikildiyi vaxtdan bəri burada iri təmir işləri aparılmayıb və o, təhlükəsizliyin müasir standartlarına cavab vermir.
Bölmənin digər xəbərləri
