ABŞ-da sərt hava şəraiti ilə bağlı 3 mindən çox aviareys ləğv edilib
Bakı, 28 noyabr, AZƏRTAC
ABŞ-da bazar günü günorta saatlarına qədər 3 mindən çox aviareys ləğv edilib, 75 reys isə təxirə salınıb.
AZƏRTAC “Axios” portalına istinadla xəbər verir ki, sərt hava şəraiti - yağıntı, ildırım və güclü külək Birləşmiş Ştatların hava nəqliyyatında problemlərə səbəb olub. Bu, “Şükranlıq günü” tətilində səyahətə çıxan təxminən 55 milyon insana təsir edib.
Bazar günü ölkənin cənub-şərqində yerləşən Tennessi ştatının Memfis və Naşvill, habelə Kentukki ştatının Luisvill və Şimali Karolina ştatının Aşvill şəhərlərində saatda 40-56 kilometr sürətlə külək əsib. Kentukki ştatının bəzi ərazilərində küləyin sürəti saatda 85 kilometrə çatıb. Əlverişsiz hava şəraiti ilə bağlı bölgədə yaşayan 14 milyon insana xəbərdarlıq edilib.
Eyni zamanda, ölkənin Şimal-Şərq və Cənub-Şərq ştatları, Orta Atlantika və Böyük Göllər rayonu leysan yağışların təsirinə məruz qalıb. Güclü yağıntı Çikaqo, Sent-Luis, Detroyt, İndianapolis, Klivlend, Atlanta, Naşvill, Tennessi, Şarlotta, Nyu-York və Boston şəhərlərində avtomobillərin hərəkətinə maneələr törədib. Yuta, Vayominq və Kolorado ştatlarına isə güclü qar yağıb.
Bölmənin digər xəbərləri
