ABŞ DÖVLƏT DEPARTAMENTİ AZƏRBAYCAN JURNALİSTLƏRİNƏ SERTİFİKAT VERMİŞDİR

25.04.2006 [19:52]
Çap et
A⁺ A^-

Amerika Birləşmiş Ştatlarının dövlət katibi Kondoliza Raysın təşəbbüsü ilə dünyanın 105 ölkəsindən 130-a yaxın jurnalist üçün həyata keçirilən üçhəftəlik proqram başa çatmışdır. Amerikanın ən tanınmış jurnalistlərindən olan Edvard Murrounun adını daşıyan proqramda Azərbaycanı AZƏRTAC-ın müxbiri Yalçın Tahiroğlu və ANS televiziyasının əməkdaşı Ceyhun Əsgərov iştirak etmişlər.

Proqram çərçivəsində jurnalistlər Vaşinqtonla yanaşı, bir sıra digər şəhərlərdə də olmuş, dövlət nümayəndələri, analitik mərkəzlərin rəhbərləri, nüfuzlu universitetlərin professorları ilə çoxsaylı görüşlər keçirmiş, ABŞ-ın federal və yerli idarəçilik prinsipləri ilə daha yaxından tanış olmuşlar. Keçirilən seminar və simpoziumlarda jurnalistikanın gələcəyi ilə bağlı fikir mübadiləsi aparılmışdır.

Proqramın sonunda dövlət katibi Kondoliza Rays jurnalistlər qarşısında çıxış etmiş, onların suallarına cavab vermişdir.

Proqramda iştirak etmiş jurnalistlərə, o cümlədən respublikamızın təmsilçilərinə ABŞ Dövlət Departamentinin sertifikatları təqdim olunmuşdur.