ABŞ DÖVLƏT KATİBİNİN MÜAVİNİ: “ARDNŞ HAZIRDA REGİONDA MÜHÜM ROL OYNAYAN ŞİRKƏTLƏRDƏN BİRİDİR”
AZƏRTAC xəbər verir ki, aprelin 22-də Azərbaycan Respublikası Dövlət Neft Şirkətinin (ARDNŞ) prezidenti Rövnəq Abdullayev ölkəmizdə səfərdə olan ABŞ dövlət katibinin müavini Ruben Cefri ilə görüşmüşdür.
Rövnəq Abdullayev qonağa Azərbaycanda xarici şirkətlərlə birgə həyata keçirilən enerji layihələri, Dövlət Neft Şirkətinin bu layihələrin icrasında qazandığı uğurlar barədə danışmışdır. Ölkə ərazisindən keçən Şərq-Qərb enerji dəhlizinin uğurla fəaliyyət göstərdiyini nəzərə çatdıran ARDNŞ prezidenti bildirmişdir ki, Azərbaycan qazının Avropaya çatdırılması məsələləri üzərində işlər davam etdirilir. Azərbaycanın Mərkəzi Asiyadan Avropaya təbii qazın nəql edilməsi üçün müvafiq infrastruktura malik olduğunu söyləyən Rövnəq Abdullayev, bu işlərin həyata keçirilməsi məqsədi ilə ölkəmizin zəruri olan infrastrukturu təqdim etməyə hazır olduğunu qeyd etmişdir.
Ətraflı məlumata görə minnətdarlığını bildirən R.Cefri ARDNŞ-in regionda mühüm rol oynayan şirkətlərdən biri olduğunu vurğulamışdır. Qonaq Şirkətin inkişaf perspektivləri ilə də maraqlanmışdır.
ARDNŞ-in inkişafına dair böyük proqramın hazırlandığını bildirən R.Abdullayev bu il şirkətin öz qüvvələri hesabına “Ümid” perspektiv strukturunda işlərə başlayacağını söyləmiş, qeyd etmişdir ki, gələcəkdə digər strukturlarda da axtarış-kəşfiyyat işləri planlaşdırılır.
Həyata keçirilən layihələrin Azərbaycana çox gözəl gələcək vəd etdiyini deyən Ruben Cefri həyata keçirilən enerji layihələrinə ABŞ-ın bundan sonra da dəstək verəcəyini bildirmişdir.
Bölmənin digər xəbərləri
