ABŞ-IN AZƏRBAYCAN VƏ TÜRK İCMASI QONDARMA “ERMƏNİ SOYQIRIMI”NI İFŞA EDƏN TƏDBİRLƏR KEÇİRƏCƏKLƏR

15.04.2006 [18:38]
Çap et
A⁺ A^-

AZƏRTAC xəbər verir ki, aprelin 22-də Nyu-Yorkun “Times Square” meydanında ABŞ-ın Azərbaycan və türk icması qondarma “erməni soyqırımı”nı ifşa etmək məqsədi ilə “Erməni yalanlarına son” devizi ilə mitinq keçirəcəklər.

Türk Amerikan Dərnəkləri Federasiyasının təşkilatçılığı ilə keçiriləcək tədbirdə Amerika Azərbaycanlıları Cəmiyyətinin sədri Tomris Azəri çıxış edərək, ermənilərin tarix boyu türk xalqlarına, o cümlədən azərbaycanlılara qarşı həyata keçirdiyi soyqırımı və terror siyasəti barədə danışacaqdır.

5 mindən çox adamın iştirakının nəzərdə tutulduğu mitinqdə erməni yalanlarını ifşa edən şüarlar səsləndiriləcək, meydanda quraşdırılacaq böyük ekranda ermənilərin Xocalıda törətdikləri vəhşiliklərdən və onların Türkiyəyə qarşı böhtanlarından bəhs edən film göstəriləcəkdir.

Bundan əlavə, aprelin 25-də BMT-nin Nyu-Yorkdakı mənzil-qərargahında təşkil ediləcək konfransda da erməni yalanları barədə məlumat veriləcəkdir.