ABŞ TÜRKİYƏ ƏRAZİSİNDƏ ÜÇ HƏRBİ DƏNİZ BAZASI YARATMAQ NİYYƏTİNDƏDİR
Hazırda ABŞ bazaları üçün iki yer seçilmişdir. Bunlardan biri Aralıq dənizi sahilindəki İsgəndərun, digəri isə Egey dənizi sahilindəki Urladır. Üçüncü baza İzmir şəhəri yaxınlığında, Mordoğan limanında yaradıla bilər.
Amerikalılar bazalar üçün yer seçərkən Türkiyənin hazırkı limanlarından istifadənin, habelə onların əsasında yeni limanların tikilməsinin mümkünlüyünü nəzərə alırlar, çünki bu limanlarda iritonnajlı gəmilər, böyük hərbi gəmilər, o cümlədən aviasiya gəmiləri dayanacaqdır.
Əvvəlcə Vaşinqton bazalardan birini Türkiyənin Qara dəniz sahilində yerləşdirməyə çalışmışdır. Lakin Ankara Qara dəniz boğazları zonasında gəmiçilik qaydalarını tənzimləyən Montrö konvensiyasının pozulmasına qarşı çıxır və bu təkliflə razılaşmamışdır. 70 il əvvəl imzalanmış bu sənəd Qara dənizdə sahilyanı dövlət olmayan ölkələrin hərbi donanmalarının daimi yerləşdirilməsini qadağan edir.
ABŞ bazaları üçün yer seçildikdən sonra obyektlərin hərbi və mülki heyətlərinin sayı, habelə onların gələcək vəzifələri müəyyən ediləcəkdir. İncirlik bazasındakı kimi, yeni bazalarda da Türkiyə nümayəndələri olmalı, hərbi obyektlərdən istifadə ilə bağlı bütün məsələlər isə yerli hakimiyyət orqanları tərəfindən həll edilməlidir.
Bölmənin digər xəbərləri
