AÇG və “Şahdəniz”dən hasil edilən qazın həcmi açıqlanıb
Bakı, 15 noyabr, AZƏRTAC
Cari ilin 10 ayı ərzində Azərbaycanda 40,1 milyard kubmetr təbii qaz hasil edilib.
AZƏRTAC Energetika Nazirliyinin yanvar-oktyabr ayları üzrə operativ məlumatlarına istinadən xəbər verir ki, qazın 10,7 milyard kubmetri “Azəri-Çıraq-Günəşli”dən, 21,8 milyard kubmetri “Şahdəniz”dən, 0,5 milyard kubmetri “Abşeron”dan, 7,1 milyard kubmetri SOCAR üzrə hasil olunub. Ötən ilin müvafiq dövrünə nisbətən 4,2 faiz, yəni 1,6 milyard kubmetr artımla qaz hasil edilib.
Hesabat dövründə xaricə qaz satışı 19,8 milyard kubmetr təşkil edib ki, bu da ötən ilin müvafiq dövrü ilə müqayisədə 8,2 faiz çoxdur. Cari ilin yanvar-oktyabr aylarında Avropaya 9,8 milyard kubmetr, Türkiyəyə 8,1 milyard kubmetr, Gürcüstana isə 1,9 milyard kubmetr qaz satılıb. Bu müddətdə Türkiyəyə TANAP-la 4,7 milyard kubmetr qaz nəql olunub.
“Azəri-Çıraq-Günəşli” və “Şahdəniz” yataqları istismara veriləndən cari il noyabrın 1-dək “Azəri-Çıraq-Günəşli”dən 214,1 milyard kubmetr, “Şahdəniz”dən isə 204,6 milyard kubmetr qaz hasil edilib. Bu dövrdə “Şahdəniz” yatağından hasil edilən qazın 144,8 milyard kubmetri ixraca nəql edilib.
Bölmənin digər xəbərləri
