REGİONLAR
ADAU-nun 17 tələbəsi xaricdə təhsil alacaq
Gəncə, 9 fevral, AZƏRTAC
Azərbaycan Dövlət Aqrar Universitetində (ADAU) “Erasmus+” proqramı çərçivəsində Avropa ölkələrində bir semestr təhsil alacaq və təcrübə keçəcək bir qrup tələbə və onların valideynləri ilə görüş keçirilib.
AZƏRTAC-ın bölgə müxbiri xəbər verir ki, görüşdə rektor Zəfər Qurbanov cari ildə ADAU-nun 17 tələbəsinin “Erasmus+” proqramı çərçivəsində Avropa ölkələrində həm təhsil almaq, həm də təcrübə keçmək imkanı əldə edəcəklərini deyib. Bildirilib ki, xaricdə təhsilin ən böyük üstünlüklərindən biri xarici dil biliklərini daha da təkmilləşdirməkdir. Z.Qurbanov xaricdə təhsil alan hər bir tələbənin ölkənin təmsilçisi olduğunu diqqətə çatdıraraq onlara öz tövsiyələrini verib.
Görüşdə, həmçinin valideynlərin fikirləri dinlənilib, sualları cavablandırılıb. Qeyd olunub ki, tələbələr xaricdə təhsil aldıqları müddətdə həm universitetin, həm də ailələrinin etimadını layiqincə doğruldacaqlar.