Ağır atletika üzrə Azərbaycan millisi Yeniyetmələrin Olimpiadasına ilk lisenziyanı qazanıb

11.04.2017 [18:24]
Çap et
A⁺ A^-

Bakı, 11 aprel, AZƏRTAC

Tailandın paytaxtı Banqkokda keçirilən yeniyetmələr arasında VII dünya birinciliyi başa çatıb.

AZƏRTAC xəbər verir ki, yüzədək ölkədən 445 atletin iştirak etdiyi turnir gələn il Argentinanın paytaxtı Buenos-Ayresdə keçiriləcək Yeniyetmələrin Olimpiya Oyunlarına təsnifat xarakteri daşıyıb. Buna görə də Banqkokda ən yaxşı nəticə göstərən komandalar Olimpiya lisenziyası qazanmaq şansı əldə ediblər. Azərbaycan bu şansdan kifayət qədər yararlana bilib.

Hər ölkə maksimum iki lisenziya əldə etmək üçün müəyyən xal ehtiyatına malik olmalı idi. Dünya birinciliyində hər bir atlet əldə etdiyi medalla yanaşı, öz ölkəsinin xal ehtiyatını müvafiq olaraq artırır. Birinci yeri tutan ağır atlet 28, ikinci yeri tutan 25, üçüncü yeri tutan 23 xal, sonrakı bütün yerlərə görə isə bir xal azalma prinsipi ilə xallar qazanılır. Belə ki, dördüncü yer üçün 22, beşinci yer üçün 21 xal və nəhayət, sonuncu - 25-ci yer üçün isə bir xal nəzərdə tutulur. Yarışda bütün çəki dərəcələri üzrə mübarizə başa çatdıqdan sonra xal ehtiyatı ən çox olan 7 ölkə iki, sonrakı 10 ölkə isə bir komanda lisenziyası əldə edib. Xal hesabı ölkənin yarışda iştirak edən altı ən yaxşı atletinin nəticələrinə əsasən müəyyən edilib.

Dünya birinciliyində iştirak edən Azərbaycan yığması da Tailanda məhz lisenziya əldə etmək məqsədilə yollanıb. Sevindirici haldır ki, komandamız bu işin öhdəsindən layiqincə gəlib. Yeniyetmə atletlərimizin tutduğu yer və qazandırdıqları xal siyahısı aşağıdakı kimidir:

N	Adı	Çəki	Yer	Xal
1.	İsmayıl Məmmədov	56 kq	16	10
2.	Elməddin Hüseynov	56 kq	8	18
3.	Elvin Abdullayev	62 kq	25	1
4.	Füqan Əliyev	62 kq	7	19
5.	Mayıl Şükürlü	77 kq	15	11
6.	Tarmenxan Babayev	77 kq	10	16
7.	Ümidvar Bayramlı	94 kq	10	16
8.	Həsənbəy Həsənzadə	+94 kq	17	9

Cədvəldən də göründüyü kimi, Azərbaycan yığmasına ən çox xal qazandıran altı atletin ümumi xalı 90 olub. Bu xallarla komandamız dünya birinciliyinin ümumi sıralamasında doqquzuncu yeri tutub və Yeniyetmələrin Olimpiya Oyunlarına bir lisenziya qazanıb.

Yeniyetmələrdən ibarət yığma komandamızın əldə etdiyi bu nəticə çox sevindiricidir. İlk növbədə, qeyd olunmalıdır ki, lisenziya 2001-2002 təvəllüdlü yeniyetmələrimiz tərəfindən qazanılıb. Baxmayaraq ki, gələn il Oyunlarda 2000-ci il təvəllüdlü atletlər də mübarizə apara biləcək, bu, bir yaş böyüklərlə yarışda uğur qazanan yeni nəslin böyük perspektivə malik olmasından xəbər verir.

Bununla yanaşı, yeniyetmələrimizin ağır atletikanın milli idman növü səviyyəsində olan Ermənistanı qabaqlaması xüsusi vurğulanmalıdır. Eyni zamanda, milli komandamızın Ukrayna, Gürcüstan, Şimali Koreya, Rumıniya və digər güclü ölkələri geridə qoyması da mühüm uğurdur.

Azərbaycan ağır atletika yığması tarixində ilk dəfə dünya birinciliyində topladığı xal hesabına Yeniyetmələrin Olimpiya Oyunlarına vəsiqə qazanıb. Komandamız buna qədər yalnız Avropa birinciliyində bu uğura nail olub. Qazanılan bu lisenziya Azərbaycanda bütün növlər üzrə Yeniyetmələrin Buenos-Ayresdə keçiriləcək Olimpiya Oyunlarına qazanılan ilk lisenziyadır.

Qeyd edək ki, Azərbaycan yığması gələn il qitə birinciliyində komanda hesabında ilk dörd yerdən birini tutarsa, daha bir lisenziyaya sahib ola bilər.