Taxılçılıq Ağsu rayonunda iqtisadiyyatın əsas sahələrindəndir. Hazırda bütün ərazi vahidlərində gələn ilin məhsulu üçün payız əkini sürətlə davam etdirilir. Rayon icra hakimiyyətinin aqrar şöbəsində
AZƏRTAC-ın müxbirinə bildirmişlər ki, bu il 25 min 651 hektar sahədən 74 min 390 ton taxıl istehsal edən torpaq mülkiyyətçiləri məhsuldarlığı 29 sentnerə çatdırmışlar. Hər yerdə payız əkini kampaniyasına mütəşşəkkil hazırlıqla başlanılmışdır. İndiyədək 19 min hektaradək sahədə səpin aparılmışdır. Rayonun dağlıq ərazilərində artıq bu kampaniya başa çatdırılmışdır. Bu mövsümdə rayonda yaradılmış “Aqroservis”ə məxsus 20, habelə fiziki şəxslər tərəfindən alınmış 15 şum traktoru, kotan və taxılsəpən aqreqatlar əkinin daha keyfiyyətlə aparılmasına imkan verir. Ümumilikdə bu kampaniyada 100-dək texnikanın gücündən istifadə edilir.
Rayonda kifayət qədər toxum tədarük olunmuşdur. Sahibkarlar akademik Cəlal Əliyevin yerli şərait üçün daha əlverişli olan “Bərəkətli”, “Qiymətli” taxıl sortlarına üstünlük verirlər. Bəzi ərazilərdə “Faktor” və “Kroşka” sortları da əkilir.
Son günlər hava şəraitinin verdiyi imkanlardan istifadə edən əkinçilər səpinin 10-15 günədək başa çatdırılması üçün ciddi səy göstərirlər. Mütəxəssislərin qənaətinə görə cari mövsümdə rayonda 28 min hektaradək sahəyə taxıl səpiləcəyi gözlənilir.
