ELM VƏ TƏHSİL
Akademik Rasim Əliquliyev: AMEA “TEKNOFEST Azərbaycan” festivalında yüksək səviyyədə təmsil olunub
![Akademik Rasim Əliquliyev: AMEA “TEKNOFEST Azərbaycan” festivalında yüksək səviyyədə təmsil olunub](/files/2022/2/1200x630/16542842686262425457_1200x630.jpeg)
Bakı, 3 iyun, AZƏRTAC
AMEA-nın vitse-prezidenti, “TEKNOFEST Azərbaycan” festivalında iştirakı üzrə İşçi qrupunun sədri akademik Rasim Əliquliyev Rəyasət Heyətinin xüsusi iclasında hesabat xarakterli məruzə ilə çıxış edib.
Bu barədə AZƏRTAC-a AMEA-dan məlumat verilib. Bildirilib ki, akademik bu festivalın ilk dəfə 2018-ci ildə Türkiyədə keçirildiyini, Azərbaycanın bu mötəbər tədbirə 2021-ci ildən qatıldığını qeyd edib. Festivalın Türkiyədən kənarda, ilk dəfə olaraq məhz Azərbaycanda təşkilinin önəminə toxunan R.Əliquliyev, tədbirin Azərbaycan Respublikasının Müstəqillik Gününə həsr olunmasının xüsusi məna kəsb etdiyini söyləyib. Akademik müstəqil Azərbaycan dövlətinin son 30 il ərzində işğal altında olan torpaqlarının azad edilməsində, Müzəffər Ali Baş Komandan İlham Əliyevin rəhbərliyi ilə rəşadətli Azərbaycan Ordusunun qazandığı nailiyyətlərdə qardaş Türkiyənin ölkəmizə siyasi və mənəvi dəstək verdiyini vurğulayıb.
R.Əliquliyev deyib ki, IV Sənaye İnqilabı və qlobal texnoloji çağırışlara cavab verən festivalın əsas hədəfləri elmin və texnologiyaların populyarlaşdırılması, Azərbaycanda aerokosmik texnologiyalar, müdafiə sənayesi və innovativ sahibkarlıq kimi sahələrin geniş təşviq edilməsi, rəqəmsal bilik və bacarıqlara, innovativ düşüncəyə malik istedadlı gənclərə dəstək göstərilməsi, ölkədə kadr potensialının gücləndirilməsi və milli texnoloji həllərin inkişafı üçün zəmin yaradılması idi.
Akademik “TEKNOFEST Azərbaycan”ın elm, texnologiya, iqtisadiyyat, siyasət, ideologiya, mədəniyyət və s. sahələri birləşdirən unikal bir platforma olduğuna diqqət çəkərək AMEA-nın festivalda tərəfdaş dövlət qurumu statusunda xüsusi pavilyonla iştirak etdiyini bildirib. O, AMEA-nın prezidenti vəzifəsini icra edən akademik Arif Həşimovun rəhbərliyi və dəstəyi ilə AMEA-nın festivalda iştirakına dair İşçi Qrupun təşkil olunduğunu, qısa bir zaman ərzində akademiyanın institutlarının festivalda iştirakının təmin olunduğunu, bu prosesə inzibati, maliyyə və digər resursların cəlb olunduğunu, eləcə də, iştirakla bağlı bütün təşkilati məsələlərin həll edildiyini diqqətə çatdırıb.
AMEA-nın festivalda yüksək səviyyədə təmsil olunduğunu bildirən məruzəçi akademiya üçün ayrılmış pavilyonda elmi müəssisələrdə və AMEA-nın Yüksək Texnologiyalar Parkında aparılan elmi araşdırmaların nəticəsi olan innovativ texnologiyalar, məhsul və layihələrin nümayiş olunduğunu qeyd edib. Akademik AMEA pavilyonuna festivalın Təşkilat Komitəsi, ayrı-ayrı dövlət qurumları, xarici şirkətlərin təmsilçiləri tərəfindən böyük maraq göstərildiyini vurğulayaraq festival çərçivəsində əməkdaşlıq üçün yeni imkanların yarandığını da bildirib.
“Qeyd olunan məsələlərlə yanaşı, “TEKNOFEST Azərbaycan” festivalı həm də AMEA-nı gələcək fəaliyyətini daha yaxşı qurmağa istiqamətləndirdi”, - deyə bildirən R.Əliquliyev akademiyanın innovativ potensialının artırılması, tətbiqi istiqamətdə əldə olunan nailiyyətlərlə daxili və xarici bazara çıxması, milli intellektual məhsulların hazırlanması, elmi fəaliyyətin kommersiyalaşdırılması istiqamətində vacib addımların atılmasının, AMEA-nın cəmiyyətdə nüfuzunun artırılmasının əhəmiyyətinə toxunub.
Vitse-prezident AMEA-da bir çox istiqamətlərdə aparılan gərgin intellektual əməyin nəticəsində böyük nailiyyətlərə imza atıldığını qeyd edərək akademiyanın öz fəaliyyətini müasir dövrün çağırışlarına uyğun qurmasının zəruri məsələlərdən olduğunu deyib.
R.Əliquliyev festivalda Azərbaycan Respublikasının Prezidenti İlham Əliyevin, Türkiyə Respublikasının Prezidenti Rəcəb Tayyib Ərdoğanın və Nobel mükafatı laureatı Əziz Səncərin çıxışlarında səsləndirlən fikirlərin əhəmiyyətindən bəhs edərək Azərbaycanın yüksək texnoloji potensialının artırılması və texnoloji suverenliyinin təmin olunmasının ölkəmizin qarşısında duran əhəmiyyətli məsələlərdən biri olduğuna diqqət çəkib. Akademik əlavə edib ki, “TEKNOFEST Azərbaycan”ın əsas məqsədlərindən biri də ölkəmizin texnoloji suverenliyinin təmini, müasir dövrün inkişaf tempinə uyğunlaşdırılması, qlobal çağırışlara uyğun olaraq mövcud imkanların Azərbaycanda tətbiqinə dəstək verməkdən ibarətdir.
“Hazırda müvafiq dövlət qurumları tərəfindən ölkəmizdə süni intellekt texnologiyalarının tətbiqi ilə bağlı milli strategiya hazırlanır”, - deyə qeyd edən R.Əliquliyev bildirib ki, bu proseslər Azərbaycan alimləri qarşısında da mühüm vəzifələr qoyur. Akademikin sözlərinə görə, Azərbaycan elminin flaqmanı olan AMEA bu işlərdə yaxından iştirak edərək beynəlxalq çağırışlara uyğun tədqiqatlara üstünlük verməlidir.
Son illər texnologiyaların cəmiyyətin bütün istiqamətlərinə nüfuz etdiyini deyən R.Əliquliyev süni intellekt, Əşyaların İnterneti texnologiyaları əsrində, informasiya partlayışı erasında müxtəlif təhlükəsizlik tədbirlərini, hüquqi, fəlsəfi və etik məsələləri təmin etmək, texnoloji mədəniyyətin təmin olunması istiqamətində müvafiq tədqiqatların aparılması, eyni zamanda, dövlət başçısının bu istiqamətdə qarşıya qoyduğu vəzifələrə dəstək verməyin önəmindən danışıb, cəmiyyətimizə elmi töhfə vermək üçün bu istiqamətdə görülən işlərin sürətləndirilməsinin vacibliyini qeyd edib.
Akademik R.Əliquliyev çıxışının sonunda Türkiyənin Samsun şəhərində keçiriləcək növbəti “TEKNOFEST”ə yaxın günlərdə hazırlıq işlərinin görülməsinə başlanılacağını, Azərbaycan elminin gələn il keçiriləcək festivalda uğurla təmsil olunması üçün bütün imkanların səfərbər ediləcəyini diqqətə çatdırıb.