ALMANİYA MÜTƏXƏSSİSLƏRİNİN FİKRİNCƏ, 2050-Cİ İLƏDƏK YOXSUL ÖLKƏLƏRDƏ ƏHALİNİN SAYI İKİ DƏFƏ ARTACAQ
AZƏRTAC-ın Bonndakı müxbiri Almaniyanın Planet Əhalisinin Tədqiq Fondunun məruzəsinə istinadla bildirir ki, dünyanın ən yoxsul ölkələrində əhalinin sayı 2050-ci ilədək iki dəfədən də çox artacaqdır. Fondun məlumatına görə, 49 ən yoxsul ölkənin sakinlərinin sayı artaraq hazırda 668 milyon nəfərdən 1,7 milyard nəfərə çatmaqdadır. Mərkəzi Afrikada 2050-ci ilədək əhalinin sayı 104 milyon nəfərdən 305 milyon nəfərə çataraq, üçqat artacaqdır. Fondun rəhbərlərindən biri- Renate Ber jurnalistlərə bildirmişdir ki, dünya əhalisi hər il təxminən 80 milyon nəfər çoxalır. Hazırda Yer kürəsinin əhalisi təxminən 6,3 milyard nəfərdir. Onlardan 1,2 milyard nəfəri sənayecə inkişaf etmiş dövlətlərdə, 5,1 milyard nəfəri isə inkişaf etməkdə olan ölkələrdə yaşayır.
