Almaniya sərhədlərdə yoxlamaları daha altı ay uzadır
Berlin, 13 fevral, AZƏRTAC
Almaniya quru sərhədlərində yoxlamaların müddətini daha altı ay uzadır.
AZƏRTAC yerli mediaya istinadən xəbər verir ki, bu barədə Kansler Olaf Şolts hökumətin iclasından sonra məlumat verib. O, hökumətin bu barədə qərarının Avropa Komissiyasına bildirildiyini qeyd edib.
Kansler sərhədlərdə yoxlamaların aparılmasına başlanmasından etibarən 47 min nəfərin ölkəyə girişinə icazə verilmədiyini vurğulayıb. Həmçinin sığınacaq almaq üçün müraciətlərin sayının 2024-cü ildə əvvəlki illə müqayisədə 34 faiz azaldığı, 1900 insan qaçaqçısının saxlanıldığı qeyd olunub.
Almaniyanın daxili işlər naziri Nensi Fezerin qərarı ilə ötən il sentyabrın 16-dan etibarən Fransa, Lüksemburq, Belçika, Danimarka və Niderland ilə sərhədlərdə yoxlamaların aparılmasına başlanılıb. Polşa, Çexiya və İsveçrə ilə sərhədlərdə 2023-cü ilin oktyabrından, Avstriya ilə sərhəddə isə 2015-ci ildən yoxlamalar aparılır. Ötən il Almaniyaya sığınacaq üçün 213 min 499 müraciət qeydə alınıb. Bu rəqəm 2023-cü ildə 324 min 636 təşkil edib.
Miqrasiya siyasətinin sərtləşdirilməsi və qanunsuz miqrasiyanın qarşısının alınması məsələsi partiyaların fevralın 23-də Almaniyada keçiriləcək növbədənkənar federal seçkilərlə əlaqədar proqramında ilk sırada yer alır.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
