ALMANİYANIN DORTMUND ŞƏHƏRİNDƏ “AZƏRBAYCAN İQTİSADİYYATI GÜNÜ” KEÇİRİLMİŞDİR
Azərbaycanın Almaniyadakı səfirliyindən AZƏRTAC-ın xüsusi müxbirinə bildirmişlər ki, mayın 6-da Almaniyanın Dortmund şəhərində “Azərbaycan İqtisadiyyatı Günü” keçirilmişdir. Dortmund Sənaye və Ticarət Palatasının təşkil etdiyi tədbirin məqsədi alman iş adamlarını ölkəmizdəki investisiya mühiti barədə məlumatlandırmaqdan ibarət olmuşdur.
Tədbirin açılış hissəsində çıxış edən Dortmund Sənaye və Ticarət Palatası sədrnin müavini Vulf Xristian Erlix Almaniya ilə Azərbaycan arasındakı iqtisadi münasibətlərin genişlənərək inkişaf etdiyini, ölkəmizin alman iş adamları üçün maraqlı məkana çevrildiyini qeyd etmişdir. O, cari ilin oktyabrında “Baku Build 2008 - İnşaat Sərgisi”ndə iştirak etmək və ölkəmizlə iqtisadi əməkdaşlıq imkanlarını nəzərdən keçirmək məqsədi ilə Şimali Reyn-Vestfalen əyalətində fəaliyyət göstərən iş adamlarından ibarət nümayəndə heyətinin ölkəmizə səfər etmək niyyətində olduğunu bildirmişdir.
Almaniyanın ölkəmizdəki səfiri Per Ştançina müstəqillik əldə olunduqdan sonra ölkəmizin qazandığı nailiyyətlərdən söz açaraq, müstəqillikdən sonra ilk dəfə 1996-cı ildə 1,3 faizlə başlayan, orta hesabla ildə 10 faiz artan və 2005-ci ildə 26,4 faizə yüksələn iqtisadiyyata malik Azərbaycanın iqtisadi artım sürətinə görə dünyada birinci olduğunu qeyd etmişdir. O, Cənubi Qafqazın ən sabit ölkəsinə çevrilmiş Azərbaycanın sənayesinə neft-qaz strategiyası çərçivəsində bu günə qədər 20 milyard dollar investisiya qoyulduğunu, adambaşına düşən xarici investisiyaların həcminə görə ölkəmizin MDB respublikaları arasında ilk sırada yer aldığını və növbəti illərdə neft-qaz sektorunun respublikamızın inkişafına daha da böyük töhfə verəcəyini, 3,5 milyard dollara yaxın dövlət investisiya xərclərinin infrastruktur layihələrinə yönəldildiyini diqqətə çatdırmışdır. Ölkədə investisiya iqliminin yaxşılaşdırılması məqsədi ilə hökumət tərəfindən aparılan islahatlara toxunan P.Ştançina, “Vahid pəncərə” sistemi və digər qanunların qəbul edilməsi ilə birlikdə alman iş adamları üçün ölkəmizlə əlverişli iqtisadi əməkdaşlıq imkanlarının yarandığını qeyd etmişdir. Azərbaycan Prezidenti İlham Əliyevin Almaniyaya, Almaniyanın Federal İqtisadiyyat və Texnologiyalar naziri M.Qlosun Azərbaycana səfərlərinin bu münasibətlərin inkişafına öz layiqli töhfəsini verdiyini ifadə edən səfir, Almaniyanın müxtəlif əyalətlərindən ölkəmizə səfər edəcək nümayəndə heyətləri barədə tədbir iştirakçılarını məlumatlandırmışdır.
Nasos avadanlığı istehsalçıları arasında aparıcı müəssisələrdən olan Almaniyanın “WILO AG” şirkətinin rəhbəri Tomas Kubbe rəhbərlik etdiyi şirkətlə ölkəmiz arasındakı əməkdaşlığa dair geniş məlumat verərək qeyd etdi ki, siyasi və iqtisadi sabitlik, dinamik iqtisadi inkişaf, alman məhsullarının Azərbaycan bazarında rəğbətlə qarşılanması kimi faktorlar, iqtisadi əməkdaşlığın daha da inkişaf etdirilməsi üçün geniş perspektiv yaradır. O, “Minimax Media Holding“ şirkəti tərəfindən təqdim olunan 2007-ci il üzrə ilin şirkəti mükafatına “WILO AG” şirkətinin layiq görülməsini məmnunluqla ifadə etmiş, digər alman şirkətlərini də ölkəmizlə fəal əməkdaşlığa çağırmışdır.
“Commerzbank” şirkətinin nümayəndəsi Per Fişer, Azərbaycanda bank sektorunun mövcud vəziyyəti barədə tədbir iştirakçılarına geniş məlumat verərək bildirmişdir ki, fəaliyyət göstərdiyi qurum Azərbaycanın 27 bankı və Azərbaycanda ixracın və investisiyaların təşviqi fondu (AZPROMO) ilə fəal əməkdaşlıq edir. Azərbaycan Milli Bankı və Beynəlxalq Bankın əhəmiyyəti barədə tədbir iştirakçılarını məlumatlandıran P.Fişer, Azərbaycanda bank sektorunun gündən-günə inkişaf etdiyini bildirmişdir.
Alman-Azərbaycan İqtisadi Təşviq Cəmiyyətinin rəhbəri (DAWF) Florian Şröder ölkəmizdə iqtisadi sahədə əldə olunan nailiyyətlər, aparılan hüquqi islahatlarla yanaşı, ölkəmizin milli-mədəni xüsusiyyətləri barədə də ətraflı məlumat vermişdir. O, Azərbaycan xalqının xüsusilə ticarət sahəsində böyük istedada malik olduğunu vurğulamışdır. Azərbaycan bazarında alman məhsullarına bəslənən rəğbətin alman şirkətləri üçün bir stimul ola biləcəyini bildirən F.Şröder, xüsusilə qida emalı, qablaşdırma, metal emalı, mebel sənayesi sahələrində əməkdaşlığa böyük ehtiyac olduğunu ifadə etmişdir.
Tədbirin sonunda çıxış edən “MAN” şirkətinin Cənubi Qafqaz və Orta Asiya ölkələri üzrə layihə meneceri Elçin Əliyev, ölkəmizin müstəqillik əldə etdikdən sonra xüsusilə iqtisadi sahədə əldə etdiyi nailiyyətlə birlikdə, dünyada etibarlı tərəfdaşa çevrildiyini vurğulamışdır. O, Azərbaycan ərazisinin 20 faizinin işğal edildiyi və 1 milyon vətəndaşın qaçqın və məcburi köçkün vəziyyətində yaşadığına toxunaraq, bəzi məsələlərin həlli üçün zamana ehtiyac olduğunu ifadə etmişdir. E.Əliyev xarici şirkətlərlə iqtisadi sahədə əməkdaşlıq üçün Azərbaycanda hər cür şəraitin yaradıldığını vurğulamışdır.
Bölmənin digər xəbərləri
