Altı avtomobilə qəsdən ziyan vuran şəxs saxlanılıb
Bakı, 21 fevral, AZƏRTAC
Bakıda 6 avtomobilə qəsdən ziyan vuran şəxs saxlanılıb.
Daxili İşlər Nazirliyinin mətbuat xidmətindən AZƏRTAC-a verilən məlumatda bildirilib ki, fevralın 19-da saat 18 radələrində Nizami rayonunun B.Nuriyev küçəsində “Nissan” markalı bir avtomobilin dövlət qeydiyyat nişanlarının çıxarılaraq yerə atılması, qanadları və qapılarının cızılaraq 2200 manat dəyərində maddi ziyan vurulması barədə polisə məlumat daxil olub.
Nizami Rayon Polis İdarəsinin 24-cü Polis Şöbəsi əməkdaşlarının keçirdikləri tədbirlər nəticəsində bu əməli törətməkdə şübhəli bilinən Bakı şəhər sakini Ramil Quliyev müəyyən olunaraq saxlanılıb.
Aparılan araşdırmalardan sonra onun həmin gün eyni küçədə “Mercedes”, “Ford”, “Hyundai” və “KİA” markalı daha 5 avtomobilin qapılarını, qanad və mühərrik örtüklərini cızaraq avtomobil sahiblərinə ümumilikdə 1600 manat dəyərində maddi ziyan vurması da müəyyən olunub.
Nizami Rayon Polis İdarəsində araşdırma aparılır.
Bölmənin digər xəbərləri
