Bakı, 22 dekabr (AZƏRTAC). Dekabrın 22-də Azərbaycan Milli Elmlər Akademiyası (AMEA) Rəyasət Heyətinin binasında AMEA-nın A.A.Bakıxanov adına Tarix İnstitutu və “Azərbaycan Televiziya və Radio Verilişləri” Qapalı Səhmdar Cəmiyyətinin (QSC) birgə istehsalı olan “Tariximizin keşiyində” sənədli filminin təqdimatı keçirilmişdir.

AZƏRTAC xəbər verir ki, tədbirdə Milli Məclisin deputatları, tanınmış elm, mədəniyyət xadimləri, ictimaiyyətin nümayəndələri iştirak etmişlər.

AMEA-nın birinci vitse-prezidenti, akademik Arif Həşimov film haqqında məlumat verərək bildirmişdir ki, bir saatlıq yeni ekran əsərində müəlliflər ölkəmizin bütün sahələrdə sürətlə inkişaf etdiyini, ötən 20 ildə Azərbaycanın böyük inkişaf yolu keçdiyini diqqətə çatdırmış, qazanılan möhtəşəm uğurlardan söhbət açmışlar.

A.Həşimov demişdir ki, müstəqilliyimizin qazanılmasından sonrakı illərdə böyük inkişaf yolu keçmiş Azərbaycanın bu yaxınlarda BMT Təhlükəsizlik Şurasının qeyri-daimi üzvü seçilməsi xalqımız üçün böyük uğurdur. Hazırda Azərbaycan bölgədə lider dövlətdir və öz gücünü gündən-günə artırır. Prezident İlham Əliyevin rəhbərliyi ilə nəinki ölkəmizdə, o cümlədən bölgədə həyata keçirilən qlobal beynəlxalq layihələrin bəhrəsi göz qabağındadır. Azərbaycan gündən-günə çiçəklənən, dünyada tanınan, beynəlxalq tribunalarda öz sözünü deməyi bacaran bir ölkə olduğunu sübut edir. Qazanılan uğurlar ölkənin hər bir vətəndaşını fərəhləndirir, xalqın dövlətimizin başçısına olan inamı daha da artırır.

Bildirilmişdir ki, AMEA Tarix İnstitutu və “Azərbaycan Televiziya və Radio Verilişləri” QSC tərəfindən yüksək səviyyədə hazırlanmış film ölkədə fəaliyyət göstərən televiziya kanalları vasitəsilə tezliklə geniş tamaşaçı kütləsinə təqdim olunacaqdır.

Sonra “Tariximizin keşiyində” sənədli televiziya filmi nümayiş etdirilmişdir.

Filmin nümayişindən sonra çıxış edən AMEA Tarix İnstitutunun direktoru, Milli Məclisin deputatı, akademiyanın müxbir üzvü Yaqub Mahmudov bildirmişdir ki, ölkəmiz tarixin çox mühüm bir dövrünü yaşayır. Hazırda müstəqil Azərbaycan Cənubi Qafqazda ən dinamik inkişaf edən ölkədir. Hələ ötən əsrin 70-ci illərindən başlayaraq Azərbaycanın böyük oğlu Heydər Əliyevin strategiyasına uyğun respublikamızda həyata keçirilən genişmiqyaslı proqramlar müasir iqtisadi potensialın formalaşdırılmasına, sosial-mədəni həyatın canlandırılmasına və milli-mənəvi dəyərlərin dirçəldilməsinə yönəldilərək gələcək müstəqilliyimizin təmin olunması üçün zəmin hazırlamışdır. Ümummilli liderin siyasi hakimiyyətə qayıdışı ilə dövlət müstəqilliyimiz qorunaraq möhkəmləndirilmiş, ölkəmiz siyasi və iqtisadi cəhətdən inkişaf etmişdir.

Bildirilmişdir ki, xalqın bütün təbəqələrinin inandığı və hörmət bəslədiyi ümummilli lider, böyük siyasi iradəyə və təcrübəyə malik şəxsiyyət - Heydər Əliyev ölkənin inkişafının əsasını qoymuşdur. O, müstəqilliyimiz üçün təhlükə törədən amilləri aradan qaldıraraq onu, öz təbirincə desək, dönməz və əbədi etmişdir. Təməli ulu öndər tərəfindən qoyulmuş dayanıqlı və məqsədyönlü inkişaf siyasəti hazırda Prezident İlham Əliyev tərəfindən uğurla davam etdirilir. Ulu öndərin layiqli davamçısı İlham Əliyevin 2003-cü ildən ölkəyə rəhbərliyi dövründə əldə olunan nailiyyətlərin, iqtisadi uğurların Azərbaycanı həyatın müxtəlif sferalarında dünya miqyasında aparıcı mövqelərə çıxardığı vurğulanmışdır. Bu gün Azərbaycan dünya səviyyəli mötəbər görüşlərin keçirildiyi mərkəzə çevrilmişdir. Bu cür tədbirlərin keçirilməsi Azərbaycanın sülhsevər, tolerant ölkə olduğunu bir daha sübut edir.

Y.Mahmudov ulu öndərin və Prezident İlham Əliyevin bütün sahələrdə olduğu kimi, Azərbaycan elminin inkişafında da müstəsna xidmətlərindən bəhs edərək demişdir ki, ümummilli lider Heydər Əliyevin hakimiyyətə yenidən qayıdışından və AMEA-nın üzvləri, elmi ictimaiyyətlə tarixi görüşündən sonra akademiya sistemində mövcud olan dərin böhran, tənəzzül, hətta iflas proseslərinin qarşısı alınmış və sabitlik yaranmışdır. Elmin inkişafı, elmi-texniki potensialın güclənməsi, yüksək ixtisaslı elmi kadrların hazırlanması, cəmiyyətdə elmi işçilərin nüfuzunun artırılması sahəsində önəmli tədbirlər həyata keçirilmişdir. Ulu öndər Heydər Əliyevin 2001-ci il 15 may tarixli Fərmanı ilə Azərbaycan Elmlər Akademiyasına “Milli Elmlər Akademiyası” statusu verilmişdir. Bu tarixi Fərman Azərbaycan xalqının sosial, iqtisadi, mədəni və mənəvi təşəkkülündə elmin rolunu, ölkənin ictimai-siyasi həyatında nüfuzunu, dövlətin tərəqqisinin təminatçısı olduğunu bir daha təsdiqləmişdir. Bütün sahələrdə olduğu kimi, elmə münasibətdə də ulu öndər Heydər Əliyev kursunun layiqli davamçısı Prezident İlham Əliyev isə elmdə islahatlar, bu sahənin inkişaf strategiyası, Elmin İnkişafı Fondunun yaradılması ilə bağlı sərəncamları ilə Azərbaycan elminin günün tələbləri səviyyəsinə yüksəlməsi istiqamətində mühüm addımlar atmışdır.

Müstəqillik illərində qazanılmış elmi nailiyyətlərdən söz açan Y.Mahmudov Tarix İnstitutunun da əldə edilmiş uğurlarla öncüllər sırasında olduğunu, xüsusən də elmimizin dünyaya inteqrasiyası baxımından fəallığı və məhsuldarlığı ilə seçildiyini vurğulamışdır. Qeyd olunmuşdur ki, Prezident İlham Əliyevin tariximizin yenidən yazılması ilə bağlı çağırışına cavab olaraq institutun kollektivi Qarabağ və Naxçıvanın, eləcə də İrəvan xanlığının əsl tarixini əks etdirən kitablar nəşr etdirmişdir. Həmin əsərlər müxtəlif xarici dillərə tərcümə olunmuşdur. Bununla yanaşı, “Borçalı tarixi” və “Dərbənd tarixi” kitabları üzərində işlərin tezliklə başa çatdırılması nəzərdə tutulmuşdur.

Alim vurğulamışdır ki, təqdim olunan sənədli film AMEA-nın kollektivinin, bütövlükdə elmi ictimaiyyətin ulu öndərə və onun layiqli varisi Prezident İlham Əliyevə minnətdarlıq duyğularının ifadəsidir. Ölkə başçısı haqqında film çəkməyin çətin bir iş olduğunu qeyd edən Y.Mahmudov gələcəkdə bu ekran əsərinin daha da təkmilləşdiriləcəyini, buraya yeni kadrların əlavə olunacağını bildirmiş, onun ərsəyə gəlməsində əməyi olanlara təşəkkür etmişdir.

Milli Məclisin sosial siyasət komitəsinin sədri Hadi Rəcəbli, mədəniyyət komitəsinin sədri, Əməkdar Elm Xadimi, AMEA-nın müxbir üzvü Nizami Cəfərov filmin məziyyətlərindən, tarixi həqiqətləri əks etdirməsindən danışmışlar. Yeni ekran əsərinin tarix və mədəniyyətin qovuşmasının təntənəsi olduğunu qeyd edən natiqlər onu yüksək qiymətləndirmişlər.

“Azərbaycan Televiziya və Radio Verilişləri” Qapalı Səhmdar Cəmiyyətinin sədri, Milli Məclisin deputatı Arif Alışanov tədbirin iştirakçılarına dərin minnətdarlığını bildirərək demişdir ki, filmin yaradıcılarının işinin yüksək qiymətləndirilməsi xalqımızın ictimai-siyasi həyatında mühüm rol oynayan dövlət xadimlərimizlə bağlı yeni-yeni ekran əsərlərinin yaradılmasına, alim və mütəxəssislərlə işbirliyinin bundan sonra da davam etdirilməsinə stimul verəcəkdir.

Bir saatlıq sənədli filmin müəllifi və aparıcısı Y.Mahmudov, rejissoru Zahid İsmayılovdur.