REGİONLAR
AMEA Naxçıvan Bölməsinin Rəyasət Heyətinin iclası keçirilib
Naxçıvan, 26 aprel, AZƏRTAC
AMEA Naxçıvan Bölməsinin Rəyasət Heyətinin növbəti iclası olub.
Naxçıvan Bölməsinin mətbuat xidmətindən AZƏRTAC-ın Naxçıvan bürosuna bildirilib ki, bölmənin sədri, akademik İsmayıl Hacıyev əvvəlcə iclasın gündəliyinə çıxarılan məsələləri iştirakçıların diqqətə çatdırıb.
Bölmənin İncəsənət, Dil və Ədəbiyyat İnstitutunun Ədəbiyyatşünaslıq şöbəsinin aparıcı elmi işçisi, filologiya üzrə fəlsəfə doktoru, dosent Aygün Orucova “Cəlil Məmmədquluzadə və “Molla Nəsrəddin” jurnalı” mövzusunda elmi məruzə edib. Satirik jurnal haqqında ətraflı məlumat verən məruzəçi jurnalın dini-fanatizmin tüğyan etdiyi ən çətin dövrdə insanların maarifləndirilməsində, cəmiyyətin mədəni inkişafına mane olan cəhalət qandalından azad olmasında əvəzsiz rolundan söz açıb.
Qeyd edilib ki, “Molla Nəsrəddin” dövrün ən müasir inqilabi məsələləri ilə yanaşı, xalqın yüz illərdən bəri davam edən dərdlərinə işıq tutub, oxucuları düşünməyə vadar edib. Fikrini xalqa çatdırmaq üçün Cəlil Məmmədquluzadə “Molla Nəsrəddin”in birinci nömrəsinin üz qabığında öz həmvətənlərini yatmış vəziyyətdə göstərən bir rəsm çəkdirib dərc etdirib, Şərqin müdrik ağsaqqallarından hesab olunan Molla Nəsrəddin obrazı ilə onları oyatmağa çalışıb. XX əsrin əvvəllərində Azərbaycan dilinə laqeyd münasibətin hökm sürməsinə baxmayaraq, böyük ədib Cəlil Məmmədquluzadə bilərəkdən məhz ana dilində yazmağı qarşısına məqsəd qoyub, jurnal doğma dilimizdə işıq üzü görüb.
Aygün Orucova məruzəsində Naxçıvan Muxtar Respublikasında hər il “Molla Nəsrəddin” jurnalının yubileyi ilə əlaqədar tədbirlərin, aprel ayında “Molla Nəsrəddin” günlərinin keçirildiyini bildirib.
Məruzə ətrafında müzakirə aparılıb, dinləyiciləri maraqlandıran suallar cavablandırılıb.
“Əhməd Cavadın 130 illiyinin qeyd edilməsi haqqında” Azərbaycan Respublikası Prezidentinin 2022-ci il 20 aprel tarixli, “Əhməd Cavadın 130 illiyinə həsr olunmuş Tədbirlər Planının təsdiq edilməsi haqqında” Naxçıvan Muxtar Respublikası Ali Məclisi Sədrinin 2022-ci il 23 aprel tarixli sərəncamları və AMEA Naxçıvan Bölməsinin qarşısında duran vəzifələr barədə danışan akademik İsmayıl Hacıyev görüləcək işləri diqqətə çatdırıb. Akademik Naxçıvan Muxtar Respublikası Nazirlər Kabinetinin 2022-ci il 6 aprel tarixli qərarından irəli gələn vəzifələrin icrası ilə bağlı göstəriş verib.
İclasda muxtar respublikanın rayonlarının tarixi ilə bağlı yazılan kitabların çapa tövsiyə olunması, AMEA Naxçıvan Bölməsi elmi-tədqiqat müəssisələrinin elmi şuralarının fəaliyyəti ilə bağlı aparılan yoxlamanın nəticələri və gündəlikdəki digər məsələlər müzakirə olunub, müvafiq qərarlar qəbul edilib.