AMEA-NIN İLLİK ÜMUMİ YIĞINCAĞI KEÇİRİLMİŞDİR
AMEA-nın həqiqi və müxbir üzvləri, qurumun institutlarının rəhbərləri ümummilli liderimiz Heydər Əliyevin və hesabat dövründə dünyasını dəyişmiş 5 akademikin xatirəsini bir dəqiqəlik sükutla yad etmişlər.
Akademiyanın prezidenti akademik Mahmud Kərimov Azərbaycan Milli Elmlər Akademiyasının 2003-cü ildəki fəaliyyəti haqqında hesabatla çıxış etmişdir. O demişdir ki, hesabat ilində Azərbaycan elminin və alimlərinin böyük himayədarı Heydər Əliyev dünyasını dəyişmişdir. Həmin il ümummilli liderimiz akademiya ilə bağlı 4 fərman və bir sərəncam imzalamışdır. Sərəncam (23 iyun 2003-cü il) elm sahəsində çalışan işçilərin əmək haqlarının artırılması ilə əlaqədardır. Bütün mənalı həyatını öz xalqına həsr etmiş Heydər Əliyevin siyasi xadim və dövlət xadimi kimi zəngin fəaliyyəti Azərbaycan xalqının tarixində əvəzsiz yer tutaraq, əsl idarəçilik məktəbinə çevrilmişdir. Xalqımızın hələ neçə-neçə nəsli bu böyük məktəbdən, bu müdrik şəxsiyyətin zəngin siyasi irsindən ölkəmizin inkişafı naminə faydalanacaqdır.
Ötən il Azərbaycan Respublikası Prezidentinin seçkiləri ilə də əlamətdardır. Həmin il oktyabrın 15-də Azərbaycan xalqı yeni minilliyin ilk prezident seçkilərində müdrik seçim etmiş, Heydər Əliyev siyasi xəttinin layiqli davamçısı İlham Əliyevə səs vermişdir. O, fəaliyyətinin ilk günlərindən başlayaraq bu yüksək etimadı layiqincə doğruldur. Noyabrın 24-də “Azərbaycan Respublikasında sosial-iqtisadi inkişafın sürətləndirilməsi tədbirləri haqqında”, bu il fevralın 11-də “Azərbaycan Respublikası regionlarının sosial-iqtisadi inkişafı Dövlət Proqramının (2004-2008-ci illər) təsdiq edilməsi haqqında” Fərmanlar imzalamışdır. AMEA-nın kollektivi Prezident İlham Əliyevin “Azərbaycan Milli Ensiklopediyasının nəşri haqqında”, “Azərbaycan dilində latın qrafikası ilə kütləvi nəşrlərin həyata keçirilməsi haqqında” Sərəncamlarından irəli gələn vəzifələri yerinə yetirmək üçün səyini əsirgəməyəcəkdir. Dövlətimizin başçısının AMEA üzvlərinin “Şöhrət” ordeni ilə təltif edilməsi haqqında 14 fevral 2004-cü il tarixli Sərəncamı alimlərimizin zəhmətinə verilmiş yüksək qiymətdir. Sərəncam alimlərimiz tərəfindən böyük minnətdarlıqla qarşılanmışdır. Bu tədbirlər Prezident İlham Əliyevin ümummilli liderimiz Heydər Əliyevin elm, təhsil və mədəniyyətə göstərdiyi qayğı və diqqəti ardıcıl davam etdirdiyini göstərir.
Məruzəçi sözünə davam edərək demişdir ki, 2003-cü ildə AMEA ölkədə aparılan irimiqyaslı islahatların elmi bazasını möhkəmləndirmək, onların intensiv həyata keçirilməsində dövlətə yardımçı olmaq, mövcud elmi-texniki potensialı qoruyub saxlamaq və inkişaf etdirmək, yüksək ixtisaslı kadrlar hazırlamaq və s. istiqamətlərdə fəaliyyətini davam etdirmiş, bir sıra elmi və elmi-təşkilati işləri həyata keçirmişdir. Həmin il aprelin 22-də AMEA-nın illik ümumi yığıncağında 2 akademik və 3 müxbir üzv, akademiyanın həqiqi üzvü İsmayıl Hacıyev isə akademiyanın Naxçıvan bölməsinin sədri seçilmişdir.
Hesabat ilində rəyasət heyəti akademiyada islahatların aparılması, idarəetmə və təşkilati sistemin təkmilləşdirilməsi, elmi tədqiqat istiqamətlərinin dəqiqləşdirilməsi, kadrların məsuliyyətinin artırılması, elmi və elmi xidmət müəssisələrinin işinin səmərəliliyinin yüksəldilməsi məqsədi ilə bir sıra qərarlar qəbul etmiş və konkret tədbirlər həyata keçirmişdir. Elmi tədqiqat müəssisələrinin fəaliyyətini tənzimləyən normativ sənədlər yenidən işlənmiş və təsdiq edilmişdir. Ötən bir ildə akademiyanın elmi istiqamətləri və elmi tədqiqat işlərinin planları ekspertizadan keçirilmiş, onun strukturunun təkmilləşdirilməsi sahəsində bir sıra tədbirlər görülmüşdür. Aktuallığını itirmiş bəzi elmi tədqiqat işləri dayandırılmış, şöbə və laboratoriyalar ləğv edilmiş, bir sıra institutlar birləşdirilmiş, yeniləri yaradılmışdır.
Natiq hesabat ilində aparılmış elmi tədqiqat işlərindən danışaraq demişdir ki, AMEA-nın elmi müəssisələrində 153 problemin 427 mövzusu üzrə elmi tədqiqat aparılmış, 100-dən artıq mühüm elmi nəticə alınmışdır. 200-dən çox kitab, 4500-dən çox məqalə və tezis çap edilmişdir.
Akademiyanın prezidenti fizika-riyaziyyat və texnika elmləri, kimya elmləri, yer elmləri, biologiya elmləri, humanitar və ictimai elmlər sahəsində nəzəri və praktiki əhəmiyyətə malik olan mühüm elmi nəticələri sadalamışdır.
Akademiklər Əli Abbasov, Bəkir Nəbiyev, Məmmədtağı Cəfərov, Əhliman Əmiraslanov, Fuad Qasımzadə, müxbir üzv Vaqif Fərzəliyev və başqaları çıxış etmişlər. Onlar irad və təkliflərini bildirdikdən sonra hesabat məruzəsini qənaətbəxş saymış və təsdiq olunmasını təklif etmişlər.
Yığıncaq müvafiq qərar qəbul etmişdir.
Gizli səsvermə yolu ilə Rusiya Elmlər Akademiyasının akademikləri Viktor Xain yer elmləri bölməsi, Jores Alfyorov isə fizika-riyaziyyat və texnika elmləri bölməsi üzrə Azərbaycan Milli Elmlər Akademiyasının xarici üzvləri seçilmişlər.
Bununla da illik ümumi yığıncaq başa çatmışdır.
Bölmənin digər xəbərləri
