ELM VƏ TƏHSİL
AMEA və TÜBİTAK arasında əməkdaşlıq əlaqələri genişlənir
Bakı, 30 oktyabr (AZƏRTAC). Azərbaycan Milli Elmlər Akademiyasının (AMEA) rəyasət heyəti mərkəzi aparatının elmi təşkilat idarəsinin rəisi, riyaziyyat üzrə fəlsəfə doktoru Əminağa Sadıqov və beynəlxalq əlaqələr idarəsinin rəis müavini Zərifə Əliyeva Ankara şəhərində ezamiyyətdədirlər.
AMEA rəyasət heyəti mərkəzi aparatının ictimaiyyətlə əlaqələr şöbəsindən AZƏRTAC-a bildirmişlər ki, səfərin məqsədi noyabr ayında Türkiyədə keçiriləcək Azərbaycan və qardaş ölkə arasında Yüksək Səviyyəli Strateji Əməkdaşlıq Şurasının üçüncü iclasında imzalanacaq ikitərəfli sənədlərin qarşı tərəflə razılaşdırılması prosesində iştirak etməkdir.
Səfər çərçivəsində AMEA ilə TÜBİTAK (Türkiyə Elm-Texnoloji Araşdırmalar Qurumu) arasında əməkdaşlıq haqqında protokol layihəsinin müzakirəsi, o cümlədən iki qurum arasında əməkdaşlığın genişləndirilməsinin perspektivlərinə dair fikir mübadiləsinin aparılması da nəzərdə tutulmuşdur.