Amerika-Azərbaycan Ticarət Palatası Silikon vadisində seminar keçirmişdir
San-Xose, 30 oktyabr (AZƏRTAC). Amerika-Azərbaycan Ticarət Palatası (USACC) San-Xosedə təşkil olunmuş elmi konfransda iştirak etmiş, yüksək texnologiyalar sahəsində ixtisaslaşmış tədqiqatçılar və biznesmenlər ilə bir sıra görüşlər, dünya şöhrətli innovasiyalar və inkişaf mərkəzi sayılan Silikon vadisində “Azərbaycan ilə Silikon vadisi arasında əməkdaşlığın perspektivləri” mövzusunda seminar keçirmişdir.
Seminar Amerika-Azərbaycan Ticarət Palatasının informasiya-kommunikasiya texnologiyaları üzrə 2013-cü il dekabrın 2-dən 5-dək davam edəcək ticarət missiyası çərçivəsində təşkil olunmuşdur.
Seminarda yerli yüksək texnologiya sənayesi şirkətlərinin nümayəndələri iştirak etmişlər.
USACC-ın icraçı direktoru Süsən Sadıqova və beynəlxalq ticarət əlaqələri üzrə məsləhətçi Elşən Baloğlanov auditoriya qarşısında Azərbaycanın təklif etdiyi böyük layihələr və onların region üçün əhəmiyyəti barədə məruzə ilə çıxış etmişlər. S.Sadıqova Azərbaycanın rəqəmsal yayımı dəstəkləməyə, internet-xidmətlər, məlumatların ötürülməsi və hökumət kommunikasiyaları sahəsində geniş imkanlar yaratmağa qadir olan “Azərspace-1” ilk telekommunikasiya peykinin buraxılması ilə genişlənən Azərbaycan informasiya-kommunikasiya texnologiyaları sektorunun sürətlə inkişaf etdiyini xüsusi vurğulamışdır.
USACC-ın icraçı direktoru, həmçinin ABŞ-ın beynəlxalq bazarlarda öz fəaliyyətini genişləndirmək marağında olan aparıcı texnologiya şirkətlərinə “Bakutel-2013” sərgisində və konfransında iştirak etməyi və beləliklə, dünyanın ən sürətlə inkişaf edən ölkələrindən birində öz məhsullarını və xidmətlərini nümayiş etdirməyi məsləhət görmüşdür.
Məruzəçilər auditoriyaya Azərbaycanın Yüksək Texnologiyalar Parkı, Trans-Avrasiya yüksək sürətli informasiya magistralı (TASIM), “Azərspace-1” kimi iri layihələrindən bəhs edərək USACC missiyasının təşkilatçılıq rolunu və qarşılıqlı faydalı dinamik tərəfdaşlığın genişləndirilməsi üçün ticarət palatasından platforma kimi istifadə olunmasını xüsusi qeyd etmişlər.
USACC-ın nümayəndə heyəti digər bir yerli elmi konfransda da iştirak etmiş, Azərbaycan bazarına maraq göstərən yerli şirkətlərin bir neçə nümayəndəsi ilə görüşmüşdür.
Amerika-Azərbaycan Ticarət Palatası dövlətimizin başçısı İlham Əliyev tərəfindən 2013-cü ilin İnformasiya-kommunikasiya texnologiyaları ili elan edilməsi çərçivəsində Azərbaycanın inkişaf etməkdə olan informasiya-kommunikasiya texnologiyaları bazarını Amerika şirkətlərinə təqdim etmək üçün öz missiyasını davam etdirir.
Yusif Babanlı
AZƏRTAC-ın xüsusi müxbiri
Vaşinqton
Bölmənin digər xəbərləri
