Amerikalılar psixi pozğunluqların müalicəsi üçün 119 yeni dərmanın buraxılmasına hazırlaşırlar
Bakı, 16 may (AZƏRTAC). Amerikanın bioəczaçılıq şirkətləri psixi pozğunluqlar əleyhinə 119 yeni preparat hazırlamışdır. Bu məlumat ABŞ Əczaçılıq Məhsullarını Hazırlayanlar və İstehsalçılar Asossiasiyasının (PhRMA) məruzəsində yer almışdır. Məruzənin müəllifləri kliniki tədqiqat mərhələsində olan və ya ərzaq məhsullarının və medikamentlərin keyfiyyətinə sanitar nəzarət üzrə idarəyə (FDA) baxılmaq üçün təqdim edilmiş dərman vasitələrini hesaba almışlar.
119 adda yeni preparatdan 39-u şizofreniyanın müalicəsi üçün təyin olunmuş, 29-u depressiyaya düşənlər, 20 dərman vasitəsi isə addiktiv pozğunluqları olan pasiyentlərin vəziyyətinin yüngülləşdirilməsi üçün təklif edilmişdir. 15 dərman isə diqqətin və hiperaktivliyin defisiti sindromu simptomlarının aradan qaldırılması üçün nəzərdə tutulmuşdur. Qalan 15 preparat həyəcan pozğunluqlarının müalicəsi üçün təyin edilmişdir.
PhRMA-nın məlumatına görə, hər dörd nəfər yaşlı amerikalıdan birinə orta ağırlıqlı psixi xəstəlik diaqnozu qoyulur. Ümumilikdə 61,5 milyon ABŞ sakininin müalicəyə ehtiyacı vardır. ABŞ-da bu xəstəliklərin illik iqtisadi tutumu 317 milyard dollara çatır - bu məbləğə müalicə xərci, iş qabiliyyəti ilə bağlı ödənişlər və itirilmiş əməkhaqqı daxildir.
Bölmənin digər xəbərləri
