AZƏRTAC xəbər verir ki, aprelin 29-da Elmi Tədqiqat Mamalıq və Ginekologiya İnstitutunda “Analıq pasportu”nun təqdimatı keçirilmişdir. Mərasimdə institutun direktoru İzzət Şamxalova bildirmişdir ki, bu sənədin Azərbaycanda tətbiq olunması təşəbbüsünü Almaniyanın Bakıdakı səfirinin xanımı Jaklin Qrevlix–Suşe irəli sürmüşdür. Səhiyyə Nazirliyi təşəbbüsü dəstəkləmişdir. Hamilə qadının səhhətinə aid bütün əsas göstəricilər – qan qrupu, rezus-amil, keçirilmiş xəstəliklər və cərrahiyyə əməliyyatları, reproduktiv anamnez, hamiləliyin gedişində aparılmış müayinələrin nəticələri pasportda əks olunacaqdır. Nazirin sərəncamına uyğun olaraq, pasport ilkin mərhələdə Bakıda və Abşeron rayonunda tətbiq ediləcəkdir.
Xanım Qrevlix-Suşe analıq pasportunun əhəmiyyətindən danışarkən vurğulamışdır ki, o, özü də ginekoloqdur, Azərbaycandakı həmkarlarının problemlərindən xəbərdardır və çalışır ki, ölkəmizdə ana və uşaqların sağlamlığının mühafizəsi Avropa səviyyəsində olsun.
Göstəricilərin qeyd edildiyi bu pasport hamilə qadınlara olduqları hər bir yerdə lazımi tibbi yardım almaqda kömək edəcəkdir.
Sonra Jaklin Qrevlix-Suşe hamilə qadınlardan birini yoxlamadan keçirərək, ona ilk “analıq pasportu”nu təqdim etmişdir.
