ANATOLİ BANİŞEVSKİNİN XATİRƏSİNƏ HƏSR OLUNMUŞ FUTBOL TURNİRİ BAŞLANMIŞDIR
AZƏRTAC xəbər verir ki, fevralın 21-də Bakı Şəhər Gənclər və İdman Baş İdarəsinin (BŞGİBİ), Baki Kəndlər Futbol Federasiyasının təşkilatçılığı ilə Azərbaycan Bədən Tərbiyəsi və İdman Akademiyasının stadionunda məşhur futbolçu, əməkdar idman ustası, “Şöhrət” ordenli Anatoli Banişevskinin xatirəsinə həsr olunmuş futbol turnirinə start verilmişdir.
BŞGİBİ-nin rəisi Məmmədhüseyn Dadaşov son vaxtlar ölkəmizdə futbolun inkişafına göstərilən diqqət və qayğıdan danışmış, qeyd etmişdir ki, turnirin keçirilməsindən məqsəd idmançıların ustalıq səviyyəsini artırmaq, klublar arasında əlaqələri möhkəmləndirmək və Anatoli Banişevskinin şərəfli həyat yolunu gənclər arasında təbliğ etməkdir.
Banişevskinin komanda yoldaşları, ailə üzvləri, Gənclər və İdman Nazirliyinin nümayəndələri və başqaları çıxış edərək, əfsanəvi futbolçunun gənc idmançılara örnək olacaq karyerası barədə məlumat vermiş, keçmiş SSRİ çempionatında və yığma komandanın heyətində uğurlu çıxışılarından söhbət açmış, dövlətimizin başçısının onun xatirəsinin əbədiləşdirilməsi ilə bağlı imzaladığı Sərəncamı futbol veteranlarına göstərilən diqqət və qayğının təzahürü kimi qiymətləndirmişlər.
Altı komandanın mübarizə apardığı turnirə fevralın 23-də yekun vurulacaqdır.
Bölmənin digər xəbərləri
