Bakı, 27 sentyabr, AZƏRTAC

Prezident İlham Əliyevin Vətən müharibəsində qəhrəmancasına döyüşmüş, müqəddəs Azərbaycan Bayrağını işğaldan azad edilən torpaqlarımızda dalğalandırmış, ölkəmizin ərazi bütövlüyü uğrunda canlarını fəda etmiş şəhidlərimizə ehtiram əlaməti olaraq 2020-ci il 2 dekabr tarixli Sərəncamına əsasən, 27 sentyabr ölkəmizdə Anım Günü kimi təsis edilib. Bu, bütün şəhidlərimizin ruhlarına, onların doğmalarına yüksək ehtiramın göstəricisidir. Ölkəmizdə mübariz oğul və qızlarımızın şücaəti hər zaman yüksək qiymətləndirilir, bütün şəhidlərimizin ruhuna ehtiram göstərilir, xatirəsi uca tutulur.

Bu fikirləri Anım Günü ilə əlaqədar fikirlərini AZƏRTAC-a açıqlamasında siyasi şərhçi Əliqismət Bədəlov bildirib.

O deyib ki, 30 il düşmən tapdağı altında qalmış torpaqlarımız qəhrəman şəhidlərimizin, əsgər və zabitlərimizin, qazilərimizin qanı və canı bahasına işğaldan azad edilmişdir. Adlarını tarixə şəhid kimi yazdıran qəhrəman Vətən oğullarının xatirələrini daim yad etmək, onları sonsuz ehtiramla xatırlamaq, məzarları önündə baş əymək hər birimizin ən ümdə borcumuzdur. Şəhidlərimiz əlçatmaz zirvədir. Prezident, Ali Baş Komandan İlham Əliyev şəhidlərimizin qürur mənbəyimiz olduğunu bildirərək deyib: “Əziz həmvətənlər, Anım Günündə bütün şəhidlərimizin xatirəsi qarşısında, Birinci və İkinci Qarabağ müharibələrinin şəhidlərinin ruhu qarşısında bir daha baş əyir, onlara Allahdan rəhmət diləyirəm. Onların yaxınlarına, qohumlarına deyirəm ki, mən demişdim, onların qanı yerdə qalmayacaq və qalmadı. Biz onların qanını aldıq! Mən demişdim ki, biz onların qisasını döyüş meydanında alacağıq, belə də oldu. Bu Qələbəni bizə bəxş edən qəhrəman əsgər və zabitlərimiz bizim qürur mənbəyimizdir”.

Siyasi şərhçi şəhidlərimizin, Vətənin azadlığı uğrunda gedən döyüşlərdə iştirak edənlərin hər birinin qəhrəmanlığının, şücaətinin, fədakarlığının artıq dastana çevrildiyini vurğulayaraq deyib: “Bu gün minlərlə şəhidi olan Azərbaycanın elə bir bölgəsi, elə bir kəndi tapılmaz ki, orada bir şəhid məzarına rast gəlməyək. Onların, demək olar ki, əksəriyyəti gənclərdir. Bu da yetişən gənc nəslin vətənpərvərlik ruhunda böyüməsindən xəbər verir. Heç vaxt gözlərim önündən getməz. 44 günlük Vətən müharibəsi zamanı gənclərimiz axın-axın Səfərbərlik və Hərbi Xidmətə Çağırış üzrə Dövlət Xidməti şöbələrinə gedərək düşmənə qarşı vuruşmaq istədiklərini bildirirdilər. Bu, gənclərimizin Prezident, Ali Baş Komandan İlham Əliyevin ətrafında sıx birləşərək Vətənin hər qarış torpağı uğrunda canlarından keçməyə hazır olduqlarının təsdiqi idi. Vətən müharibəsində gənclərimizin yüksək fiziki və mənəvi hazırlığı, vətənpərvərlik hissi müharibə zamanı da özünü büruzə verdi. Müzəffər Ali Baş Komandan İlham Əliyevin rəhbərliyi ilə yenilməz Ordumuzun sıralarında gənclərimizin şanlı tarix yazması Azərbaycan gəncliyinin yüksək vətənpərvərlik ruhunda yetişməsinin məntiqi nəticəsidir”.

Haqq və şərəf işimiz olan, Azərbaycanın suverenliyi və ərazi bütövlüyü uğrunda gedən mübarizədən söhbət açan siyasi şərhçi bildirib ki, qəhrəmanlıq göstərən əsgər və zabitlərimiz, arxa cəbhədə çalışan mülki insanlarımız, bütövlükdə, xalqımız bir yumruq kimi birlik və həmrəylik nümayiş etdirərək, düşmənə sarsıdıcı zərbələr endirdi və Ermənistanın 30 illik işğalına son qoydu: “Bu parlaq Qələbə Azərbaycan tarixinin ən şanlı səhifəsi oldu. Prezident İlham Əliyev 2003-cü il oktyabrın 31-də keçirilən andiçmə mərasimindəki çıxışında verdiyi vədi yerinə yetirdi. Dövlətimizin başçısı andiçmə mərasimindəki nitqində demişdir: “Azərbaycanın torpaqları işğaldan azad olunmalıdır, bir milyon qaçqın və köçkün öz doğma yurdlarına qayıtmalıdır, ölkəmizin ərazi bütövlüyü bərpa edilməlidir. Azərbaycan heç vaxt bu vəziyyətlə, torpaqlarının işğal altında qalması ilə barışmayacaqdır. Hamı bilməlidir ki, sülh tərəfdarı olmağımıza baxmayaraq, müharibənin yenidən başlanmamasını və bu məsələnin sülh yolu ilə həllini istəməyimizə baxmayaraq, bizim səbrimiz də tükənməz deyildir. Azərbaycan öz doğma torpaqlarını nəyin bahasına olursa-olsun, azad edəcəkdir!”.

Siyasi şərhçi dövlətimizin başçısının qarşıya qoyduğu mühüm vəzifələrdən birinin də ordu quruculuğunun inkişaf etdirmək, silahlı qüvvələrimizi ən müasir silah-sursatla təmin edilməsi olduğunu bildirib: “2020-ci il sentyabrın 27-də atəşkəs rejimini kobud şəkildə pozan işğalçı Ermənistan silahlı qüvvələri bütün cəbhə boyu Azərbaycan Ordusunun mövqelərinə intensiv zərbələr endirməklə yanaşı Tərtər, Ağdam, Füzuli və Cəbrayıl rayonlarının yaşayış məntəqələrini qəsdən artilleriya atəşinə tutaraq ölkəmizə qarşı növbəti təcavüzə başladılar. Düşmənin hərbi təxribatını dəf etmək və təcavüzünə son qoymaq məqsədilə Silahlı Qüvvələrin Ali Baş Komandanı İlham Əliyev dərhal bütün cəbhə boyu əks-hücuma keçmək əmri verdi.

Ə.Bədəlov deyib ki, bu müharibə cəmi 44 gün davam etdi və Azərbaycanın tarixi Qələbəsi ilə yekunlaşdı: “44 günlük Vətən müharibəsi xalqımızın şanlı tarixi, şəhidlər və qazilər qürur mənbəyimizdir. Respublikamızın suverenliyi və ərazi bütövlüyü uğrunda gedən mübarizədə əsgər və zabitlərimizin qəhrəmanlığı, şücaəti, fədakarlığı artıq dastana çevrilib. Zəfər yolunda şəhid olanlar hər birimizin qəlbində əbədi heykəlini qoyublar. Anım Günü şəhidlərimizə ehtiramın ifadəsi olmaqla yanaşı, gənc nəslin vətənpərvər ruhda tərbiyə olunması, vətəndaşlarımızın birliyinin daha da möhkəmlənməsi baxımından mühüm əhəmiyyətə malikdir. Milli həmrəyliyimizin təcəssümü olan Vətən müharibəsindəki şanlı Qələbə və 2023-cü ildə Azərbaycan Ordusunun Qarabağda apardığı lokal xarakterli antiterror tədbirləri ölkəmizin ərazi bütövlüyünü bərpa etdi.

“Müzəffər Ali Baş Komandan, Azərbaycan əsgəri və Azərbaycan xalqı bir daha sübut etdi ki, şəhidlərimizin qanı nahaq yerə tökülmədi. Bu gün Azərbaycan dövləti qalib dövlət kimi yaşayır, bundan sonra da müzəffər xalq və qalib dövlət kimi əbədi yaşayacaq”, – deyə siyasi şərhçi bildirib.