Aparılan tədqiqatlar nəticəsində Xəzər dənizində 111 min baş suitinin olması müəyyənləşib
Bakı, 27 aprel, AZƏRTAC
Xəzər suitisi dəniz məməlilərinin ən kiçiyidir və Azərbaycanın “Qırmızı kitab”ına daxil edilən növdür. Azərbaycanda Xəzər suitisi 1952-ci ildən ovlanmır. Xəzəryanı ölkələr arasında Azərbaycan birinci olaraq Xəzər suitisinin ovuna qadağa qoyub. Ötən il Xəzəryanı ölkələrin Su Bioloji Resursları Komissiyasının qərarı ilə Rusiya və Qazaxıstan da Xəzər suitisinin ovlanmasına qadağa qoyub və onu “Qırmızı kitab”a daxil ediblər.
XX əsrin əvvəllərində Xəzər dənizində suitinin populyasiyası təxminən 1 milyon baş təşkil edirdi. 20 il öncə aparılan tədqiqatlar nəticəsində onun sayının 380 min baş olduğu müəyyənləşib.
AZƏRTAC xəbər verir ki, bunu “Ekspert saatı”nda Bioloji Müxtəlifliyin Qorunması Xidmətinin Bioloji resursların tədqiqatı mərkəzinin direktoru Mehman Axundov deyib.
M.Axundov, həmçinin qeyd edib: “Xəzər dənizində ekosistemin tarazlığının pozulması nəticəsində suitilərin də sayı azalıb. Bu, əsasən kilkələrin ehtiyatının azalması ilə bağlıdır. İngiltərənin Lids Universitetinin apardığı tədqiqatlar əsasında hazırda Xəzər dənizində 111 min baş suitinin olması müəyyən edilib. Bu, ümumi ekosistemin vəziyyətini əks etdirir. Yəni, bütün növlər müəyyən gərginlik vəziyyətindədir. Son 4-5 ildir ki, vəziyyət müsbətə doğru dəyişib. Hazırda Xəzər dənizində ekosistemin bərpa prosesi gedir. Dənizdə kilkə ehtiyatı artır. Ekosistem bərpa olunandan sonra suitilərin, o cümlədən digər balıq növlərinin də sayının artacağına inanırıq”.
Bölmənin digər xəbərləri
