“Apple” yeni texnologiya və avadanlıqlara 10,5 milyard dollar ayıracaqdır
Bakı, 14 noyabr (AZƏRTAC). “Apple” şirkəti 2014-cü maliyyə ilində kapital xərcləri üçün rekord 10,5 milyard dollar məbləğində vəsait ayırmaq niyyətindədir.
Bu vəsaitlərin əsas hissəsi texnologiyaların inkişafı və yeni avadanlıqların yaradılması üçün nəzərdə tutulur.
Belə ki, ABŞ şirkəti vəsaitləri “MacBook” kompyuterlərinin alüminium korpuslarının istehsalı üçün frezer və lazer dəzgahların, eləcə də “iPhone 5c” smartfon modelinin plastik korpuslarının cilalanması məqsədilə avadanlıqların əldə edilməsi və mobil qurğuların rəqəmsal kameralarının optik şüşələrinin sınaqlarına yönəldəcəkdir.
“Apple” kapital qoyuluşunun məbləğinə görə yalnız bir elektronika istehsalçısından - “Samsung” şirkətindən geri qalır. Ötən il Koreya istehsalçısının sərmayə yatırımı 22 milyard dollara bərabər olmuşdur.
Qeyd edək ki, “Apple” bu yaxınlarda hazırda əksər smartfonlarda geniş tətbiq olunan sapfir şüşə istehsalına 578 milyon dollar vəsait yatırmışdır.
Bölmənin digər xəbərləri
