AQRAR SAHƏNİN İNKİŞAFI ÜÇÜN MÖHKƏM QANUNVERİCİLİK BAZASI OLMALIDIR
Milli Məclis Aparatının iqtisadi qanunvericilik şöbəsi müdirinin müavini - aqrar qanunvericilik bölməsinin müdiri Şahmərdan Kərimov AZƏRTAC-ın müxbirinə demişdir ki, 2004-cü ilin birinci yarımilinə 13 min 896 ailə 1161 kollektiv müəssisədə, 1057 ailə 163 istehsal kooperativində, 984 ailə 376 kiçik müəssisədə, 352 ailə isə 111 müxtəlif təşkilati-hüquqi formal digər müəssisədə birləşərək kənd təsərrüfatı istehsalı ilə məşğul olurlar. Torpaq payı almış 846 min ailə isə fiziki şəxs kimi fəaliyyət göstərir. Bundan başqa, hesabat tarixində hüquqi şəxs kimi qeydiyyatdan keçmiş 2614 kəndli (fermer) təsərrüfatı, habelə Kənd Təsərrüfatı Nazirliyinin 41, Əmək və Əhalinin Sosial Müdafiəsi Nazirliyi Baş Məşğulluq İdarəsinin isə 93 dövlət kənd təsərrüfatı müəssisəsi fəaliyyət göstərir. Bütövlükdə ölkə üzrə müxtəlif təşkilati-hüquqi formal kənd təsərrüfatı müəssisələrinin sayı 2149-a çatmışdır. Orta hesabla bir ailəyə 1,9 hektar, kənd təsərrüfatı müəssisələrinə 89 hektar, kəndli fermer təsərrüfatlarına 7,2 hektar kənd təsərrüfatına yaralı torpaq sahəsi düşür. Bununla belə bazar münasibətləri mühiti aqrar sahənin sosial strukturunun yenidən formalaşdırılması prossesinə öz təsirini göstərir. Milli Məclisin aqrar siyasət və iqtisadi siyasət daimi komissiyaları aqrar sahənin intensiv inkişafını təmin etmək, bu sahədə mövcud olan problemləri aradan qaldırmaq məqsədi ilə qanunvericilik bazasını möhkəmləndirir, yeni qanunlar hazırlayır. Bu günə qədər bu sahə ilə bağlı 50-dən çox qanun qəbul edilmişdir. Hazırda, təsərrüfatını genişləndirmək, intensiv texnologiyaları tətbiq etmək imkanı olmayan minlərlə ailənin hüquqi statusunu müəyyən edəcək, onların sosial müdafiəsini möhkəmləndirəcək “Ailə kəndli təsərrüfatı haqqında” yeni qanun layihəsi hazırlanaraq Milli Məclisin müzakirəsinə çıxarılmışdır.
Ş.Kərimov işçi qrupun “Kənd təsərrüfatı haqqında” və “Balıqçılıq təsərrüfatı haqqında” da yeni layihələr hazırlandığını demişdir.
