ASİYA QRİFLƏRİNİN KÖKÜ KƏSİLƏ BİLƏR
Alimlər Hindistanın şimal və mərkəz bölgələrində apardıqları tədqiqatların nəticələrinə görə 1990-cı illərin axırlarından bəri ağbel qriflərin populyasiyası 99,9 faiz azalaraq 30 milyondan 11 minə düşmüşdür. Eyni müddətdə nazikdimdik qriflərin sayı demək olar ki, 97 faiz azalmışdır.
Alimlərin fikrincə, ölmüş heyvanların əti ilə qidalanan qriflərin sayının azalmasının əsas səbəbi baytarlar tərəfindən ağrıkəsici və iltihab əleyhinə vasitə kimi istifadə edilən diklofenak preparatıdır. Diklofenakdan baytarlıqda istifadə edilməsi hələ 2006-cı ildə qadağan olunduğuna baxmayaraq Hindistan əhalisi onun geniş miqyasda tətbiqini davam etdirir.
Tədqiqatın rəhbəri, London Zoologiya Cəmiyyətinin nümayəndəsi Endrü Kanningemin fikrincə, “qriflərin kökünün kəsilməsi ətraf mühit üçün dramatik nəticələrə gətirib çıxaracaqdır. Ağbel qriflər təbiətin əsas sanitarlarıdır. Onların kökü kəsilərsə, külli miqdarda heyvan leşi yığılıb qala bilər. Bu isə su mənbələrinin çirklənməsi, habelə siçovulların və goreşənlərin hücumu ilə nəticələnə bilər”.
Bölmənin digər xəbərləri
