ASTARALI İDMANÇILAR RESPUBLİKA TURNİRİNDƏ UĞURLA ÇIXIŞ ETMİŞLƏR

21.10.2004 [10:53]
Çap et
A⁺ A^-

AZƏRTAC-ın müxbiri xəbər verir ki, Azərbaycanın müstəqilliyi, azadlığı, torpaqlarımızın erməni işğalından azad edilməsi uğrunda şəhid olmuş Mehman Ələkbərovun xatirəsinə həsr olunmuş sərbəst güləş üzrə yeniyetmələrin dördüncü Respublika turnirində astaralı idmançılar uğurla çıxış etmişlər.

Gəncənin yeni Olimpiya idman kompleksində 300 güləşçinin iştirakı ilə keçirilən turnirdə Astara rayon uşaq-gənclər idman məktəbinin yetirmələri Ruslan Rəsulov 35 kiloqram və Elşad Ağayev 50 kiloqram çəki dərəcələrində bütün görüşləri qələbə ilə başa vuraraq qızıl medallara layiq görülmüşlər.

Bu mötəbər yarışlarda rayon yığma komandasının üzvlərindən İlqar Ağayev, Nurlan Ramazanov və Fərid Əhmədov müxtəlif çəki dərəcələrində ikinci, Samir Mehdiyev isə üçüncü yeri tutmuşlar.

Qaliblərə turnirin medalları, diplomları, kubokları və qiymətli hədiyyələri təqdim olunmuşdur.