Naxçıvan, 16 may, Rauf Kəngərli, AZƏRTAC

Azərbaycan Respublikasının Prezidenti İlham Əliyev Ümummilli Liderimizin Naxçıvan Muxtar Respublikasına çox böyük geostrateji əhəmiyyətə malik bir məkan kimi xüsusi diqqət və qayğısını uğurla davam etdirir. Bunu İlham Əliyevin on yeddi illik prezidentlik dövründə on beş dəfə, demək olar ki, hər il müxtəlif vaxtlarda muxtar respublikaya səfər etməsi də təsdiqləyir. Prezident İlham Əliyevin bu il mayın 10-da - ulu öndərimiz Heydər Əliyevin anadan olmasının 98-ci ildönümü günü Naxçıvana səfəri isə bir sıra mühüm hadisələrlə rəmzi xarakter daşıyır.

Bu sözləri AZƏRTAC-ın Naxçıvan bürosuna müsahibəsində Naxçıvan Muxtar Respublikasının Əməkdar jurnalisti Mehriban Sultan deyib. O bildirib ki, tarixi Zəfər sonrası dövlət başçımızın Ümummilli Liderin ilk doğum gününü Naxçıvanda qeyd etməsi xüsusi əhəmiyyət kəsb edir. Prezident İlham Əliyev dahi şəxsiyyətin layiqli siyasi varisi kimi ata vəsiyyətinə ləyaqətlə əməl edərək təkcə Qarabağı erməni işğalından qurtarmadı, eyni zamanda, Naxçıvanın da otuz illik blokadadan azad olunması istiqamətində mühüm addım atdı, Naxçıvanın da Qarabağ qədər əhəmiyyətli, əziz olduğunu təsdiqlədi. Bu səfər Ali Baş Komandanımızın ata yurduna qalib və məğrur sərkərdə kimi səfəri idi. Eyni zamanda, Prezidentin Naxçıvana Vətən müharibəsində qazanılan tarixi Zəfərdən sonra ilk dəfə Ulu Öndərin doğum günündə səfər etməsi Azərbaycanın qazandığı bugünkü uğurlara görə borclu olduğumuz dahi şəxsiyyəti - Heydər Əliyevi bəxş etmiş ata yurduna, qədim və ulu Naxçıvana minnətdarlıq duyğusu, mənəvi varislik borcundan doğan bir addım idi.

Mehriban Sultan vurğulayıb ki, dövlət başçısının Naxçıvana səfəri dünyanın pandemiya böhranı məngənəsində boğulduğu, iqtisadi tənəzzül yaşadığı bir dövrdə müharibədən yenicə çıxmış Azərbaycanda muxtar respublikanın timsalında sosial-iqtisadi inkişafın əvvəlki dinamik templə davam etdiyini təsdiqləmiş oldu. Səfər çərçivəsində Prezident İlham Əliyevin Naxçıvan Beynəlxalq Hava Limanının yeni uçuş-enmə zolağının təqdimatında iştirak etməsi blokada dövründə Naxçıvanın yeganə nəqliyyat əlaqəsinin hava yolları olduğunu, insanların gediş-gəliş üçün necə deyərlər, “havadan asılı qaldığı” illəri, bu gün isə istənilən hava şəraitində beynəlxalq aviareyslərin belə təhlükəsiz həyata keçirilməsi üçün müasir şəraitin yaradıldığını əyani şəkildə bir daha sərgilədi. Yeni uçuş-enmə zolağı qədim diyarımızın yaxın gələcəkdə turistləri, beynəlxalq tədbir iştirakçılarını yüksək səviyyədə qarşılayıb-yola salmağa imkan verəcək. Prezident Azərbaycan xalçaçılıq sənəti tarixində özünəməxsus yeri və rolu olan Naxçıvan xalçaçılıq məktəbinin yaşadılması və inkişaf etdirilməsi, yun və təbii boyaq bitkilərinin tədarükü üçün yerli xammal ehtiyatından səmərəli istifadə etmək məqsədilə “Azərxalça” Açıq Səhmdar Cəmiyyətinin Naxçıvan filialının, uzunluğu 50 kilometr olan Culfa-Ordubad magistral avtomobil yolunun, muxtar respublikada heyvandarlığın inkişafı məqsədilə yaradılan, ölkə üzrə ikinci Süni Mayalanma Mərkəzinin, 13 min 500 sakini beynəlxalq standartlara cavab verən təmiz içməli su ilə təmin edəcək “Ordubad rayon mərkəzi və ətraf kəndlərinin içməli su təchizatı və kanalizasiya sistemlərinin yenidən qurulması” layihəsinin açılışlarında da iştirak etdi. Eyni zamanda, Ordubad dəmir yolu stansiyasında aparılan yenidənqurma işləri, ictimai xidmətlər sahəsində çox önəmli bir təsisat sayılan, Naxçıvanda informasiya-kommunikasiya texnologiyalarının ən son nailiyyətlərinin tətbiqi istiqamətində görülən işlərin davamı olan “ASAN xidmət” Mərkəzinin tikintisi ilə tanışlıq oldu, milli brendimiz sayılan DOST Mərkəzinin Naxçıvanda da yaradılması ilə bağlı qərar qəbul edildi.

“Prezident İlham Əliyevin növbəti səfərinin digər bir rəmzi mənası Vətən müharibəsi sonrası ordusu, saxta hərbi imici tamamilə darmadağın edilən Ermənistandan fərqli olaraq, Azərbaycanın hərbi qüdrətini daha da gücləndirmək istiqamətində ordu quruculuğunun uğurla, düşünülmüş şəkildə davam etdirilməsi ilə əlaqədardır. Dövlətimizin başçısının iştirakı ilə Naxçıvan Muxtar Respublikası kimi strateji bölgədə Əlahiddə Ümumqoşun Ordunun hərbi aerodromunun açılışı dediklərimizin sübutudur. Xatırladaq ki, müstəqil Azərbaycanın bugünkü müzəffər ordusunun təməli ümummilli liderimiz Heydər Əliyev tərəfindən 1991-ci il sentyabrın 7-də Naxçıvan Muxtar Respublikası Ali Məclisinin Sədri kimi qəbul etdiyi ilk qərarla Naxçıvanda Dövlət Milli Müdafiə Komitəsinin yaradılması ilə qoyulmuşdu. Vaxtilə Naxçıvan ərazisində yerləşən Rusiya Federasiyası Silahlı Qüvvələrinin 75-ci motoatıcı diviziyasının silah və texnikasının, yaşayış binalarının 1992-ci ilin iyul-avqust aylarında Ümummilli Liderin müdrik siyasəti nəticəsində Müdafiə Komitəsinə təhvil verilməsi düşmənlə təkbətək və əliyalın mübarizə aparan, ozamankı ölkə rəhbərliyi tərəfindən tamamilə tərk edilmiş bir diyarda ordu quruculuğu baxımından ideal addım, tarixi zərurət idi”, - deyən Mehriban Sultan vurğulayıb ki, bu gün muxtar respublikanın ordu potensialı aviasiya texnikalarının qəbul edilməsi və saxlanmasından tutmuş müasir silah və texnika ilə təchizat baxımından əksər ölkələrin regionlarında olmayan nəhəng hərbi aerodromun yaradılmasını zərurətə çevirib. Digər yeni istifadəyə verilən müasir hərbi infrastruktur isə müasir tibbi avadanlıqla təchiz edilən 290 çarpayılıq Naxçıvan Qarnizonu Mərkəzi Hospitalı - Naxçıvan Muxtar Respublikasının ən böyük tibb müəssisəsi oldu. Xəstəxananın istifadəyə verilməsi, 2021-2022-ci tədris ilindən etibarən Naxçıvan Dövlət Universitetində Hərbi tibb ixtisası üzrə kadr hazırlığına başlanması muxtar respublikada hərbi tibbi xidmət səviyyəsinin də yüksəldilməsinə öz töhfəsini verəcək.

Mehriban Sultan bildirib ki, kontinental iqlimə malik Naxçıvanın vaxtilə mənfur düşmənin naqis əməllərinə görə elektrik enerjisinə və mavi yanacağa həsrət qalması üzündən burada həyat ritmi tamamilə pozulmuş, insanların intellekt potensialı, yaradıcılıq əmsalı, fiziki və mənəvi sağlamlığı iflic vəziyyətinə salınmışdı. Bu gün isə Heydər Əliyev siyasətinin uğurlu davamının bəhrəsidir ki, muxtar respublikada enerji təhlükəsizliyi tam təmin edilib. Prezident İlham Əliyev Araz çayı üzərində tikilən Ordubad Su Elektrik Stansiyasının tikintisi ilə tanışlığı muxtar respublikanın enerji təchizatının çox yaxında tamamilə alternativ enerji mənbələri hesabına ödəniləcəyinə zəmanət verir. Ümumiyyətlə, yeni istifadəyə verilən obyektlər ölkəmizdə, eləcə də muxtar respublikamızda inkişaf strategiyasının uğurla və davamlı həyata keçirildiyini, Naxçıvan özünün ərzaq, enerji, müdafiə və informasiya təhlükəsizliyinə nail olduğunu, burada ordu quruculuğuna xüsusi diqqət yetirildiyini təsdiqlədi. Hər yeni obyektin, eyni zamanda, yeni iş yeri demək olduğunu nəzərə alsaq, onda bütün bunların həm də insan amilinə verilən yüksək dəyərin ifadəsi olduğunu görmüş oluruq. Prezident İlham Əliyevin dediyi kimi: “Burada, Naxçıvan Muxtar Respublikasında bir çox önəmli tədbirlərdə, açılışlarda iştirak etdim. Respublika inkişaf edir, çiçəklənir, bütün məsələlər öz həllini tapır - təhlükəsizlik, sosial-iqtisadi inkişaf, sənaye, kənd təsərrüfatı, infrastruktur. Biz bundan sonra da bu yolla gedəcəyik ki, ölkəmizin hər bir yerində, əlbəttə ki, bizim tarixi diyarımız olan Naxçıvan Muxtar Respublikasında işlər həmişə yüksək səviyyədə görülsün, insanlar daha da yaxşı yaşasınlar və ölkəmiz daha da güclənsin”.

Səfər zamanı Ordubad dəmir yolu stansiyası ilə tanışlıq ölkə başçısının da müsahibəsində vurğuladığı kimi təsadüfi deyil. Zəngəzur dəhlizinin açılması istiqamətində tarixi addım olduğunu söyləyən Mehriban Sultan qeyd edib ki, işğalçı Ermənistanın son 30 il ərzində ölkəmizə qarşı törətdiyi mənəvi, hüquqi, iqtisadi terrorlardan biri Naxçıvanı ərazi etibarilə Azərbaycandan ayrı salmaq idi. Düzdür, xilaskarımız olan Ulu Öndərin, onun ətrafında sıx birləşən, bir yumruğa dönən naxçıvanlıların şücaəti sayəsində düşmən bu qədim Azərbaycan diyarını diz çökdürə, boyun əydirə, işğal edə bilmədi. Lakin ata-baba torpağımızdan keçib öz ölkəmizə getməyə həsrət qaldıq. Nəhayət məşhur qırğız yazıçısı Çingiz Aytmatovun “Gün var əsrə bərabər” əsərindəki “Bu yerlərdə qatarlar Şərqdən Qərbə, Qərbdən Şərqə gələr gedər... gedər gələrdi” frazası ilə bütün dolğunluğu ifadə edə biləcəyimiz bu nisgilə də son qoyulacaq. Prezident İlham Əliyevin dediyi kimi: “Şərqi Zəngəzur bölgəsində yerləşən Zəngilanı bizim qədim torpağımız olan Qərbi Zəngəzurla, ondan sonra Ordubad vasitəsilə Naxçıvanla və Türkiyə ilə birləşdirmək bizim növbəti tarixi nailiyyətimiz olacaq”.

Mehriban Sultan deyib: “Dövlət başçısının muxtar respublikaya hər səfəri, buradakı quruculuq, inkişaf prosesi ilə tanış olması, dövlət siyasətinin, xüsusilə də yeni sosial-iqtisadi layihələrin uğurla həyata keçirilməsi ilə bağlı yüksək təəssüratla ayrılması həm də Naxçıvanın uğurlu tarixi hesabatıdır. Bu mənada, dövlət başçımızın son səfəri zamanı keçirilən tədbirləri Azərbaycan Respublikasının Prezidenti İlham Əliyevin 2019-cu ilin noyabr ayında Naxçıvan Muxtar Respublikası Ali Məclisinin Sədri Vasif Talıbovu qəbul etməsinin davamı olan növbəti uğurlu hesabat kimi də dəyərləndirmək olar. Həmin qəbul zamanı müzakirə olunan məsələlərdən biri də Naxçıvanın təhlükəsizliyi, ordu quruculuğunun ardıcıl davam etdirilməsi ilə bağlı idi. Dövlətimizin başçısı son səfərində verdiyi müsahibədə bu istiqamətdə görülən işlərə toxunaraq, İkinci Qarabağ müharibəsində Naxçıvan Ordusunun hərbçilərinin fəal iştirak etməsini, şəhidlər verməsini, böyük fədakarlıq göstərməsini qürurla xatırlatdı. Müsahibədə ilk dəfə olaraq o da bildirildi ki, Naxçıvan Ordusunda olan silahların, sursatların bir hissəsi də cəbhəyə göndərilmişdir. Prezidentin “Naxçıvan Muxtar Respublikasının həm respublikanın hüdudlarının müdafiə edilməsində, ümumiyyətlə, ölkəmizin ordu potensialının güclənməsində çox böyük rolu var və hər zaman Naxçıvan lazımi dərəcədə müdafiə olunacaqdır” mesajı “dəmir yumruq” altında can verən, bununla da Naxçıvan iştahası da ömürlük gözündə qalan düşmənə daha bir ölümcül zərbə oldu”.

Bəhs etdiyimiz qəbul zamanı 36 meqavat gücündə Ordubad Su Elektrik Stansiyasının, Culfa-Ordubad yolunun, Süni Mayalanma Mərkəzinin tikintisi və digər məsələlərlə bağlı qaşıya qoyulan vəzifələr Prezident İlham Əliyevin mayın 10-da etdiyi səfər zamanı reallığa çevrildi. Bu, muxtar respublikada ümummilli lider Heydər Əliyev ideyalarının, bu ideyaların davamı olan müasir dövlət siyasətinin dəqiqlik və sədaqətlə həyata keçirildiyini bir daha təsdiqlədi. Dövlət başçısının son səfəri bütünlüklə onu isbat etdi ki, Naxçıvan Muxtar Respublikasında daha sürətli inkişaf istiqamətində görülən işlər muxtar respublikanın inkişafında yeni mərhələnin əsasını qoyub. Prezident İlham Əliyevin də dediyi kimi: “...Muxtar respublika hərtərəfli inkişaf edir və bu gün Naxçıvan ölkəmizin ən inkişaf etmiş bölgələrindən biridir. Əminəm ki, Naxçıvan bu liderliyi bundan sonra da saxlayacaqdır”.