Avropa Komissiyası Aİ Şurasına Gürcüstana namizəd statusunun verilməsini tövsiyə edib
Tbilisi, 8 noyabr, AZƏRTAC
Avropa Komissiyası Avropa İttifaqı (Aİ) Şurasına Gürcüstana namizəd statusunun verilməsini tövsiyə edib.
AZƏRTAC xəbər verir ki, bu barədə Avropa Komissiyasının Prezidenti Ursula Fon der Lyayen Avropa İttifaqının qonşuluq və genişlənmə danışıqları üzrə komissarı Oliver Varhelyi ilə birgə mətbuat konfransında bildirib.
“Gürcüstan namizəd statusu əldə etməlidir, çünki həqiqətən də bu istiqamətdə addımlar atılıb. Təbrik edirik”, - Lyayen deyib.
Ursula Fon der Lyayen Aİ-nin Gürcüstan xalqının Avropa istəyini tam dəstəklədiyini bildirib. O, Gürcüstan hökumətini bu istəyi nəzərə almağa, müxalifət və vətəndaş cəmiyyəti ilə əməkdaşlıq etməyə, həmçinin daha əvvəl təqdim edilmiş 12 tövsiyənin yerinə yetirilməsinə fokuslanmağa çağırıb.
Ursula Fon der Lyayen, həmçinin Gürcüstan müxalifətini parlament proseslərində iştirak etməyə çağırıb. Əlavə edib ki, Gürcüstan de-oliqarxizasiya istiqamətində nəzərəçarpan addımlar atıb, həmçinin anti-korrupsiya şurası təsis edilib, ona görə də Avropa Komissiyası namizəd statusunun verilməsini tövsiyə edir.
Qeyd edək ki, Avropa İttifaqı Gürcüstana namizəd statusunun verilməsi ilə bağlı yekun qərarı bu ilin dekabrında verəcək.
AZƏRTAC-ın xüsusi müxbiri
Tbilisi
Bölmənin digər xəbərləri
