AVROPADA YAŞAMAQ ÜÇÜN ƏN YAXŞI ÖLKƏ İSLANDİYADIR
Görünür, İslandiyada yaşayanların bəxti gətirmişdir. Berlin Əhali Məskunluğu və İnkişafı İnstitutunun ekspertləri belə qənaətə gəlmişlər ki, Avropada yaşayış üçün ən yaxşı ölkə məhz İslandiyadır. Təbii şəraiti o qədər də əlverişli olmayan bu ölkə zənginliyi və yüksək inkişaf etməsi, təhsilin və doğumun yüksək səviyyəsi ilə fərqlənir.
AZƏRTAC xarici KİV-lərə istinadla xəbər verir ki, Berlin institutu “Avropanın demoqrafik gələcəyi. Regionlar necə dəyişir” adlı yeni tədqiqatında Aİ-nin 285 bölgəsi, İslandiya, Norveç və İsveç üzrə 24 demoqrafik, iqtisadi və sosial göstəricini təhlil etmişdir. Liderlər arasında, İslandiyadan başqa, Şimali Avropa regionları da vardır.
Həyat səviyyəsinə və demoqrafik göstəricilərə görə ən yüksək nəticələr Oslo və Stokholmdadır. İlk onluğa İsveçrənin yeddi bölgəsindən altısı daxildir. İrlandiya və Böyük Britaniyanın, Benilüks ölkələrinin, Fransa, Avstriya, cənubi Almaniya, Şimali İtaliya və şimal-şərqi İspaniyanın reytinqi də kifayət qədər yüksəkdir.
Ən əlverişsiz demoqrafik göstəricilər cənubi İtaliyanın kənd təsərrüfatı bölgələrində, Yunanıstan, Bolqarıstan, Rumıniya və Polşada müşahidə olunmuşdur. Bu yerlərdə doğum səviyyəsinin çox aşağı olması, gənclərin kütləvi şəkildə xarici ölkələrə axını əhalinin kəskin şəkildə qocalmasına səbəb olur.
Bölmənin digər xəbərləri
