AVSTRALİYA HƏRBİ KONTİNGENTİ İRAQI TƏRK EDİR
AZƏRTAC xəbər verir ki, İraqda yerləşdirilmiş Avstraliya hərbi kontingenti ölkəni tərk edir. Ən-Nasiriyyə şəhərindən təqribən 500 hərbi qulluqçunun çıxarılması iyunun 1-də başlanmışdır. Onları ABŞ hərbçiləri əvəz edəcəklər. Bölmənin düşərgəsində Avstraliya bayrağı endirilmişdir.
Ötən ilin sonlarında Bağdada səfər edən Avstraliyanın Baş naziri Kevin Radd bildirmişdir ki, İraqda Avstraliya qoşunlarının missiyası 2008-ci ilin iyununda başa çatacaqdır. Radd jurnalistlərə demişdir: “Hazırda bu Yaxın Şərq ölkəsində yalnız bir neçə yüz hərbi qulluqçu qalacaqdır ki, onlardan yalnız yardımçı əməliyyatların aparılmasında, xüsusən, diplomatların mühafizəsi üçün istifadə olunacaqdır”.
ABŞ və onun müttəfiqləri 2003-ci ilin martında İraqda hərbi əməliyyata başladıqdan sonra Avstraliya hökuməti birincilər sırasında öz qoşunlarını bu ölkəyə göndərmişdir. Lakin qitə sakinlərinin azı 80 faizi həmvətənlərinin həmin əməliyyatda iştirakının əleyhinədir.
Bölmənin digər xəbərləri
