AVSTRİYA, KANADA VƏ ALMANİYA PARLAMENTLƏRİNİN NÜMAYƏNDƏLƏRİ QUBADA OLMUŞLAR
AZƏRTAC xəbər verir ki, Azərbaycan Parlamentinin 90 illik yubileyi münasibətilə ölkəmizdə səfərdə olan Avstriya, Kanada və Almaniya parlamentlərinin nümayəndələri Qubada olmuşlar.
Şəhərlə tanışlıqdan sonra qonaqlar Qubadakı kütləvi məzarlığa baş çəkmişlər. Xarici deputatlar burada gördükləri saysız-hesabsız insan sümüklərindən dəhşətə gəldiklərini demişlər. Kütləvi məzarlıqda tədqiqat aparan elmi ekspedisiyanın rəhbəri Qəhrəman Ağayev qonaqlara məlumaty vermişdir ki, kütləvi məzarlıq 2007-ci il aprelin 1-də təsadüf nəticəsində aşkar edilmişdir. Tədqiqatlar məzarlığın 1918-ci il mayın 1-10-da ermənilərin azərbaycanlılara qarşı törətdiyi soyqırım zamanı yarandığını sübut edir. Burada insanlar xüsusi amansızlıqla qətlə yetirilmişlər. Aşkar olunan sümüklərin heç birində güllə izi yoxdur. Bu, onların amansızlıqla öldürüldüyünü, başlarının kəsildiyini göstərir. Tarixi məlumatlara görə, ermənilər tərəfindən 1918-ci ildə Qubada 3 minə yaxın soydaşımız qətlə yetirilmişdir.
Avstriya Parlamentinin üzvü Karl Olinger bu dəhşətli soyqırım barədə təmsil etdiyi qurumda məsələ qaldıracağını demişdir.
Qonaqları Quba Rayon icra Hakimiyyətinin rəhbərliyi və Milli Məclisin üzvü Asim Mollazadə müşayiət etmişlər.
Bölmənin digər xəbərləri
