Vyana, 31 may, AZƏRTAC

Avstriyada nikotin istehlakı illər ərzində azalmağa doğru getsə də, pandemiya dövründə tütün məhsulları və nikotin tərkibli məhsulların istehlakı yenidən artıb.

AZƏRTAC xəbər verir ki, bu barədə “Avstriyada sağlamlıq“ təşkilatı məlumat yayıb. Ümumdünya Tütünlə Mübarizə Günü ilə əlaqədar açıqlanan hesabatda bildirilir ki, Avstriya Macarıstandan sonra Avropada ən çox siqaret çəkilən ölkədir və tütün məhsullarından istifadə ölkədə ən geniş yayılmış asılılıq vərdişidir.

Hesabatda göstərilir ki, ölkədə ölüm hallarının təxminən 16 faizi tütün məhsulları və nikotin tərkibli müasir vasitələrin istehlakı ilə əlaqəlidir. Ölkədə hər beş nəfərdən biri gündəlik əsasda tütün məhsulları və ya elektron inhalyasiya məhsulları istehlak edir.

Aparılan sorğularda ailə və iş həyatında stressin artması, sosial çevrə və ümumi əhval-ruhiyyənin aşağı olması tütün istehlakının artması üçün əsas səbəblər kimi göstərilib. 2020-ci ildə ölkədə əhalinin 17,2 faizi tütün məhsullarının aludəçisi idisə, 2022-ci ildə bu göstərici 20,3 faizə qalxıb.

Təşkilat yeniyetmə və gənclər arasında müasir dövrün trendinə çevrilən elektron siqaretlər, nikotin tərkibli tüstüsüz inhalyasiya vasitələrinin populyarlığının artması və yanlış olaraq onların siqaretlə müqayisədə daha az zərərli olması fikirlərinə dair xəbərdarlıq edib. Bildirilib ki, mövcud qanunvericilik bu istiqamətdə sərtləşdirilməli, eləcə də yeniyetmə və gənclər arasında maarifləndirmə işləri gücləndirilməlidir.