Azərbaycan-Türkiyə strateji müttəfiqliyi Türk dünyasının gücünü artırır - ŞƏRH
Bakı, 2 oktyabr, AZƏRTAC
Azərbaycan ilə Türkiyə arasında strateji müttəfiqlik yalnız iki ölkənin münasibətləri ilə məhdudlaşmır, bütövlükdə Türk dünyasının iqtisadi, siyasi və geosiyasi mövqeyinin möhkəmləndirilməsində mühüm rol oynayır. Müasir beynəlxalq münasibətlər sistemində baş verən dəyişikliklər bu birliyin daha da gücləndirilməsini, iqtisadi əlaqələrin genişləndirilməsini və yeni əməkdaşlıq istiqamətlərinin müəyyənləşdirilməsini zəruri edir.
Bunu AZƏRTAC-a açıqlamasında Türk İslam Araşdırmaları Mərkəzinin sədri Telman Nüsrətoğlu bildirib.
Onun sözlərinə görə, prezidentlər İlham Əliyev və Rəcəb Tayyib Ərdoğanın rəhbərliyi ilə inkişaf edən Azərbaycan-Türkiyə münasibətləri ortaq tarixə, qardaşlığa, qarşılıqlı etimada və strateji maraqlara əsaslanır.
“Bu müttəfiqlik Cənubi Qafqazda əməkdaşlığın genişlənməsinə, türk dövlətləri arasında əlaqələrin möhkəmlənməsinə mühüm töhfə verir. Dəyişən dünya reallıqları iki ölkə arasında iqtisadi əməkdaşlığın yeni mərhələyə yüksəldilməsini tələb edir. Ənənəvi ticarət dövriyyəsinin artırılması ilə yanaşı, rəqəmsal ticarət, yüksək texnologiyalı məhsulların birgə istehsalı, sənaye, yaşıl enerji və kənd təsərrüfatı sahələrində ortaq layihələrin həyata keçirilməsi də prioritet istiqamətlər olmalıdır. Azərbaycan-Türkiyə münasibətlərinin gələcək inkişafı mövcud siyasi və hərbi əməkdaşlıqla yanaşı, iqtisadiyyatın müxtəlif sahələrində konkret nəticələr verən birgə layihələrin artırılmasından da asılıdır. Qarşılıqlı investisiyaların genişləndirilməsi, nəqliyyat əlaqələrinin inkişafı və texnoloji əməkdaşlığın gücləndirilməsi iki ölkənin potensialının daha səmərəli reallaşdırılmasına və Türk dünyasının beynəlxalq mövqeyinin möhkəmlənməsinə töhfə verə bilər”, - deyə mərkəz sədri qeyd edib.
Telman Nüsrətoğlu Azərbaycanın işğaldan azad edilmiş ərazilərində Türkiyə şirkətlərinin iştirakının da xüsusi əhəmiyyət daşıdığını vurğulayıb. Bildirib ki, bu əməkdaşlıq yeni infrastrukturun qurulması, istehsal müəssisələrinin yaradılması, texnologiyaların tətbiqi və məşğulluğun artırılması baxımından əlavə imkanlar yaradır.
Mərkəzin sədri Orta Dəhlizin inkişafını Azərbaycan-Türkiyə əməkdaşlığının əsas istiqamətlərindən biri kimi səciyyələndirib. Onun sözlərinə görə, Azərbaycanın Şərq ilə Qərb arasında mühüm nəqliyyat qovşağı kimi mövqeyi və Türkiyənin Avropa bazarlarına çıxış imkanları bu marşrutun əhəmiyyətini artırır: “Bakı-Tbilisi-Qars dəmir yolunun yükdaşıma qabiliyyətinin yüksəldilməsi, Xəzər dənizində liman infrastrukturunun genişləndirilməsi və logistika imkanlarının təkmilləşdirilməsi beynəlxalq yükdaşımaların inkişafına töhfə verə bilər”.
O, Zəngəzur dəhlizinin perspektivlərinin də geniş regional kontekstdə qiymətləndirilməsinin vacibliyini qeyd edib. Bildirib ki, nəqliyyat bağlantılarının inkişafı Azərbaycan və Türkiyə ilə yanaşı, Mərkəzi Asiya ölkələri və digər türk dövlətləri üçün də yeni ticarət və logistika imkanları yarada bilər.
Telman Nüsrətoğlu müdafiə sənayesi və təhlükəsizlik sahələrində əməkdaşlığın da strateji müttəfiqliyin mühüm tərkib hissəsi olduğunu diqqətə çatdırıb. Qeyd edib ki, birgə istehsal layihələri, texnologiya mübadiləsi və sənaye potensialının birləşdirilməsi iki ölkənin müdafiə imkanlarının inkişafına xidmət edir.
Bölmənin digər xəbərləri
