Milli Xalça Muzeyində “Xalçalar diyarı” sərgisi açılıb
Bakı, 29 oktyabr, AZƏRTAC
Oktyabrın 29-da “Bakıya uçuş. İncəsənət həftəsonu. Gələcəyi İNDİ duy” festivalı çərçivəsində Azərbaycan Milli Xalça Muzeyində “Xalçalar diyarı” sərgisi açılıb.
AZƏRTAC xəbər verir ki, sərgidə Azərbaycan xalça sənətinin zəngin irsi müasir bədii yanaşmalarla təqdim olunur, ənənə ilə innovasiya arasında yaradıcı dialoq qurulur.
Milli Xalça Muzeyinin direktoru Əminə Məlikova çıxışında bildirib ki, muzey artıq ikinci ildir Heydər Əliyev Fondunun vitse-prezidenti Leyla Əliyevanın təşəbbüsü ilə keçirilən “Fly to Baku. Bakıya uçuş. Art Weekend” layihəsinə qoşulur. Onun sözlərinə görə, Heydər Əliyev Fondunun, Mədəniyyət Nazirliyinin və incəsənət sahəsində fəaliyyət göstərən bir sıra qurumların dəstəyi ilə həyata keçirilən layihə muzeydə müxtəlif tədbirlərin təşkilinə şərait yaradır.
Əminə Məlikova bu ilin muzey üçün xüsusi əhəmiyyət daşıdığını vurğulayıb. O qeyd edib ki, bu il Lətif Kərimovun anadan olmasının 120 illiyi qeyd olunur. Direktor belə sərgi və layihələrin incəsənət nümunələrinin tanıdılması, ictimaiyyətin mədəniyyətə marağının artırılması baxımından əhəmiyyətindən də danışıb.
Mədəniyyət nazirinin müavini Səadət Yusifova Azərbaycan xalça sənətinin xalqımızın əsrlər boyu formalaşmış zəngin mədəni yaddaşını, estetik zövqünü və milli kimliyini yaşadan unikal xəzinə olduğunu bildirib.
O qeyd edib ki, ekspozisiya Azərbaycan xalçaçılıq sənətinin görkəmli nümayəndəsi, alim və xalq rəssamı Lətif Kərimovun zəngin irsini əks etdirir. Ustadın 120 illik yubileyi münasibətilə onun eskizləri əsasında ilk dəfə toxunmuş nadir ipək xalçaların nümayişi mədəniyyət tariximiz üçün əlamətdar hadisədir.
Səadət Yusifovanın sözlərinə görə, Lətif Kərimovun irsinin rəqəmsal sənət vasitəsilə müasir baxışla təqdim olunması milli irsin gənc nəslə çatdırılmasında texnologiyaların imkanlarını nümayiş etdirir.
Sərgidə nümayiş olunan bir sıra əsərlərin müəllifi olan Yaşar Malfouzi bildirib ki, uzun müddətdir muzeylə əməkdaşlıq etməyi arzulayıb. Təbrizdə yaşadığını və ailəsinin xalçaçılıq ənənələri ilə bağlı olduğunu deyən sənətkar Lətif Kərimovun iki əsərinin xalça üzərində canlandırılmasını özü üçün böyük şərəf adlandırıb. O, layihənin həyata keçirilməsinə verdiyi dəstəyə görə muzeyə təşəkkürünü bildirib.
Qeyd edək ki, ekspozisiyada Azərbaycan Milli Xalça Muzeyinin banisi, görkəmli alim və xalq rəssamı Lətif Kərimovun irsi, müasir rəssamlar - Mədinənin və Nərmin Nəcəfin, eləcə də xalça mütəxəssisi Yaşar Malfouzinin əsərləri təqdim olunur.
Lətif Kərimovun 120 illik yubileyi münasibətilə sənətkarın müəllifi olduğu iki eskiz əsasında ilk dəfə toxunmuş relyefli ipək xalçalar sərginin diqqətçəkən nümunələrindəndir.
Ustadın zəngin yaradıcılıq irsinə müasir baxış Azərbaycan Milli Xalça Muzeyi və HUG.art platformasının birgə təşkilatçılığı ilə keçirilən rəqəmsal sənət müsabiqəsinin qaliblərinin əsərləri ilə davam etdirilir.
Ekspozisiyada, həmçinin Mədinənin və Nərmin Nəcəfin rəsm əsərləri əsasında toxunmuş xalçalar yer alır. Bu nümunələr təsviri sənətlə ənənəvi xalçaçılıq arasında yaradıcı əlaqəni üzə çıxarır, xalçanın müasir bədii ifadə vasitəsi kimi geniş imkanlarını nümayiş etdirir.
Sərgidə Azərbaycan Milli Xalça Muzeyinin kolleksiyasında qorunan, XIX əsrə aid “Quşlu” Bakı xalçası əsasında hazırlanmış relyefli xalça, eləcə də Yaşar Malfouzinin müəllifi olduğu iki relyefli xalça da nümayiş olunur.
“Bakıya uçuş. İncəsənət həftəsonu. Gələcəyi İNDİ duy” layihəsi çərçivəsində muzeydə davam edən Əməkdar rəssam Faiq Əhmədin “Faiq Əhməd: 2011–2024-cü illər dövrü” sərgisi də yeni əsərlərlə zənginləşdirilib.
Sərgi noyabrın 29-dək davam edəcək.
Bölmənin digər xəbərləri
