Avstriyada dəmiryolçuların ümummilli tətili keçirilir
Bakı, 28 noyabr, AZƏRTAC
Bu gün "Avstriya Dəmir Yolları" nəqliyyat şirkəti işçilərinin ümummilli tətili keçirilir. Tətil gecə yarısına qədər davam edəcək.
AZƏRTAC “Der Standard” qəzetinə istinadla xəbər verir ki, tətil səbəbindən bütün ölkə üzrə qatarların hərəkəti dayandırılıb, qonşu dövlətlərlə dəmir yolu əlaqəsi kəsilib. “Avstriya Dəmir Yolları”nın 50 minə yaxın əməkdaşı işə çıxmayıb. Sərnişinlərin istifadə edə bilməyəcəyi biletlər dekabrın 5-dək etibarlı olacaq.
Etiraz aksiyası bələdiyyə nəqliyyat kompaniyaları tərəfindən idarə olunan Vyana metrosuna və şəhərin tramvay xətlərinə təsir göstərmir.
Tətilə dəmiryolçuların həmkarlar ittifaqının əməkhaqqını 400 avro artırmaq tələbi səbəb olub. Bu, nəqliyyat kompaniyasının təxminən 430 min əməkdaşını əhatə etməli idi. İşəgötürənin maraqlarını təmsil edən Avstriya İqtisadiyyat Palatası bu təklifi rədd edərək, min avro məbləğində birdəfəlik bonus ödənilməklə, maaşın 200 avro artırılmasına razılıq verib. Danışıqların bazar günü keçirilən beşinci raundu zamanı həmkarlar ittifaqlarının nümayəndələri bu şərti qəbul etməyib və tətil keçirilməsi elan olunub.
Bölmənin digər xəbərləri
