AVSTRİYANIN TİCARƏT NÜMAYƏNDƏ HEYƏTİ BAKIYA GƏLƏCƏKDİR
AZƏRTAC xəbər verir ki, Avstriyanın ticarət nümayəndə heyəti Cənubi Qafqaz ölkələrinə səfər çərçivəsində iyunun 2-3-də Bakıda olacaqdır.
Səfər iki ölkə arasında mövcud ticarət və iqtisadi əlaqələrin inkişafı baxımından mühüm əhəmiyyət kəsb edir. Səfər çərçivəsində Avstriya tərəfindən təmsil olunan şirkətlərə uyğun yerli şirkətlərin iştirakı ilə biznes forumun keçirilməsi də nəzərdə tutulmuşdur.
Avstriya nümayəndə heyəti ilə iyunun 2-də Azərbaycan Respublikası Sahibkarlar (İşəgötürənlər) Təşkilatları Milli Konfederasiyasında (ASK) görüş keçiriləcəkdir. Görüşün məqsədi Azərbaycan iş adamları ilə Avstriya iş adamlarının ikitərəfli görüşlərini təşkil etmək, birgə əməkdaşlıq imkanlarını araşdırmaq və qarşılıqlı iqtisadi əlaqələr yaratmaq, ölkəyə xarici investisiyaların cəlb edilməsinə kömək etməkdən ibarətdir.
Nümayəndə heyətinə Avsrtiyanın ölkəmizdəki səfiri Marius Kalligaris, Avstriyanın Rusiya Federasiyasındakı səfirliyinin ticarət müşaviri Kausl və Avstriyanın İqtisadiyyat Palatasının MDB ölkələri üzrə regional direktoru H.Valter rəhbərlik edəcəklər.
Bölmənin digər xəbərləri
