AZƏRBAYCAN GÜLƏŞÇİLƏRİ BEYNƏLXALQ TURNİRDƏ İŞTİRAK EDƏCƏKLƏR

08.08.2006 [12:45]
Çap et
A⁺ A^-

Azərbaycan Güləş Federasiyasından AZƏRTAC-a bildirmişlər ki, avqustun 18-20-də Polşanın Sedlçe şəhərində dünya çempionu Zialkovskinin xatirəsinə həsr olunmuş sərbəst güləş üzrə beynəlxalq turnir keçiriləcəkdir.

Yarışda Azərbaycanın idman şərəfini məşqçi Aslan Ağayevin rəhbərliyi ilə Namiq Abdullayev (55 kq), Namiq Sevdimov (55 kq), Arif Abdullayev (60 kq), Abil İbrahimov (66 kq), Elman Əsgərov (66 kq), Elnur Aslanov (74 kq) və Xızır Durqayev (120 kq) qoruyacaqlar.

Bu beynəlxalq turnir hazırda Daxili İşlər Nazirliyinin İdman Cəmiyyətində təlim-məşq toplanışında iştirak edən Azərbaycan yığma komandası üçün dünya çempionatı ərəfəsində sonuncu yoxlama-sınaq yarışı olacaqdır.

Çempionat sentyabrın 29-dan oktyabrın 2-dək Pekin şəhərində keçiriləcəkdir.