Ankarada kəlağayı ənənələrinə həsr olunmuş rəsm sərgisi açılıb
Ankara, 3 oktyabr, AZƏRTAC
Ankarada “Fırça” (“Кисть”) Rəsm və İncəsənət Qalereyasında azərbaycanlı rəssam Elçin Mustafayevin ənənəvi Azərbaycan ipək baş örtüyü - kəlağayıya həsr olunmuş fərdi sərgisi açılıb.
“Zəriflik – keçmişdən gələcəyə” adlı sərginin təşkilinə ölkəmizin Türkiyədəki səfirliyinin nəzdində fəaliyyət göstərən Azərbaycan Mədəniyyət Mərkəzi dəstək verib.
AZƏRTAC xəbər verir ki, sərgidə Azərbaycan qadınının obrazını daim bəzəyəcək kəlağayının motivlərinə, ornamentlərinə və naxışlarına həsr olunmuş 20-dən çox rəsm əsəri nümayiş etdirilir.
“Kəlağayı yalnız keçmişin ənənələrinə ehtiram deyil, həm də aktuallığını itirməyən qadın gözəlliyinin dəyişməz rəmzidir”, – deyə bu qədim sənət növünün bu gün də geniş yayıldığı Şəkidə böyümüş rəssam bildirib.
O xatırladıb ki, UNESCO kəlağayının ənənəvi sənətini və simvolikasını, eləcə də bu baş örtüyünün hazırlanması və istifadəsi ənənəsini Qeyri-maddi mədəni irsin reprezentativ siyahısına daxil edib.
Həmyerlimiz Karaman şəhərindəki Karamanoğlu Mehmetbey Universitetinin İncəsənət, Dizayn və Memarlıq fakültəsində dərs deyir. Onun fərdi sərgiləri daha əvvəl Azərbaycan və Türkiyə ilə yanaşı, Rusiyada da təşkil olunub.
Ankaranın Çankaya rayonunda təşkil olunan sərgi oktyabrın 19-dək davam edəcək.
Bölmənin digər xəbərləri
