Tarixçi alim: Azərbaycançılıq ideologiyasının əsasında dövlət bayrağımızın bütün rəngləri dayanır
Bakı, 28 oktyabr, AZƏRTAC
Azərbaycançılıq ideologiyası xalqımızın milli özünüdərkinin formalaşması, dövlətçilik ənənələrinin qorunması, ölkədə yaşayan bütün xalqların və etnik azlıqların vahid ideya ətrafında birləşməsi baxımından mühüm əhəmiyyət daşıyır. Bu ideologiyanın tarixi əsasları Azərbaycan Xalq Cümhuriyyətinin yaradılmasından əvvəlki dövrlərə gedib çıxır. Müstəqil dövlətçilik ənənələrimizin bərpası, milli-mənəvi dəyərlərin qorunması və cəmiyyətdə həmrəyliyin möhkəmləndirilməsi istiqamətində həyata keçirilən siyasətdə azərbaycançılıq ideyası xüsusi yer tutur.
Bu fikirləri AZƏRTAC-a açıqlamasında tarix üzrə fəlsəfə doktoru Cavid İsmayıl deyib.
O bildirib ki, Gülüstan və Türkmənçay müqavilələrindən sonra Şimali Azərbaycan torpaqlarında milli ideologiya ilə bağlı zaman-zaman maraqlı müzakirələr aparılıb. Bu müzakirələrin kulminasiyası olaraq 1918-ci il mayın 28-də tarixdə ilk dəfə Azərbaycan adlı dövlət – Azərbaycan Xalq Cümhuriyyəti yaradılıb və onun üçrəngli bayrağı qəbul edilib.
“Çar Rusiyasının tərkibinə müsəlman kimi daxil olan Şimali Azərbaycan əhalisi, sonradan imperiyanın dağılması prosesindən azərbaycanlı və ya Azərbaycan türkləri kimi çıxdı. 1920-ci il aprelin 28-də Azərbaycanın bolşeviklər tərəfindən işğalı milli özünüdərk və dövlətçilik tarixinin inkişafı prosesində uzunmüddətli fasilə yaradıb. Lakin SSRİ-nin tənəzzülü ilə müttəfiq respublikalarda başlayan milli-azadlıq hərəkatları xalqların özünüdərk prosesində yeni mərhələ açıb. Azərbaycanda Cümhuriyyət tarixinin və irsinin öyrənilməsi istiqamətində araşdırmalara başlanılıb. Bu mərhələnin ən mühüm hadisələrindən biri 1990-cı il noyabrın 17-də Ulu Öndər Heydər Əliyevin rəhbərliyi ilə Naxçıvanda baş verib. Həmin gün Azərbaycan Xalq Cümhuriyyətinin üçrəngli Dövlət Bayrağı Naxçıvan Muxtar Respublikasının Dövlət Bayrağı kimi qəbul edilib”, - deyə tarixçi alim vurğulayıb.
Onun fikrincə, Azərbaycanın dövlət müstəqilliyini bərpa etməsindən sonra milli ideologiya ilə bağlı müxtəlif müzakirələr aparılsa da, onların hamısı dövlət bayrağımızın rənglərinin ifadə etdiyi məna ilə sıx bağlı olub.
“Türkləşmə, müasirləşmə, islamlaşma – Cümhuriyyətimizdən miras qalan bayrağımızın rənglərinin mənası budur. Zaman-zaman hansısa siyasi qruplar tərəfindən bayrağın ayrı-ayrı rənglərinin qabardılmasına baxmayaraq, bu dövlət rəmzi əslində bütün rəngləri ilə birlikdə tamdır. Ümummilli Lider Heydər Əliyevin azərbaycançılıq ideyasının əsasında da Azərbaycan Bayrağı bütün rəngləri ilə birlikdə dayanır. Çünki bayrağımız Azərbaycan ərazisində tarixən mövcud olmuş multikulturalizmi və tolerantlığı əks etdirir. Bu baxımdan, Azərbaycandakı müxtəlif dinlərin və xalqların mədəniyyətinin dövlət tərəfindən qorunması və himayə olunması bir rəngin adına yazıla bilməz. 1993-cü ildə xalqın tələbi və Qurtuluş missiyası ilə ikinci dəfə hakimiyyətə qayıdan Heydər Əliyev Azərbaycanın xilas yolunu bütün azsaylı xalqları və etnik azlıqları vahid çətir altında - azərbaycançılıq ideologiyası ətrafında birləşdirməkdə görüb. Zaman Ümummilli Liderin haqlı olduğunu ortaya qoydu. Xüsusən Vətən müharibəsi dövründə və antiterror əməliyyatı zamanı Azərbaycan Respublikasında yaşayan bütün xalqların nümayəndələrinin çiyin-çiyinə verərək milli qürur savaşına qalxması məhz azərbaycançılıq ideologiyasının təsiri altında formalaşmış yeni nəslin qələbəsi idi”, – deyə tarix üzrə fəlsəfə doktoru Cavid İsmayıl vurğulayıb.
Bölmənin digər xəbərləri
