Dubay-Ben-Qurion uçuş reysində terror aktına cəhd olub
Qahirə, 3 oktyabr, AZƏRTAC
Sentyabrın 30-da Dubay Beynəlxalq Hava Limanından (DXB) Ben-Qurion Beynəlxalq Hava Limanına (TLV) FZ 1073 nömrəli reysi yerinə yetirən hava gəmisində uçuş zamanı baş vermiş insidentin səbəbi açıqlanıb. Araşdırmalar nəticəsində aydın olub ki, köməkçi pilot terror aktına cəhd edib.
AZƏRTAC “əl-Hədəs” telekanalına istinadla xəbər verir ki, bu barədə BƏƏ-nin baş prokuroru Həmd Seyf əl-Şəmsi bildirib.
Rəsmi açıqlamaya görə, uçuş zamanı köməkçi pilot kabinədə kapitana fövqəladə vəziyyət baltası ilə hücum edib və təyyarənin idarəetmə vasitələrinə nəzarəti ələ keçirməyə çalışıb.
Baş prokuror bildirib ki, istintaq davam edir. Araşdırma çərçivəsində hadisənin bütün təfərrüatları, mümkün motivlər və əlaqələr, həmçinin maddi və rəqəmsal sübutlar araşdırılır. Yekun nəticələrin araşdırma başa çatdıqdan sonra açıqlanacağı qeyd olunub.
Bundan əvvəl mediada yayılan məlumatlarda isə köməkçi pilotun vaxtilə Suriyada olduğu və radikal fikirlərdən təsirləndiyi iddia edilmişdi. Həmçinin onun radikal fikirlərə malik olduğu səbəbindən Oman tərəfindən uçuşlardan uzaqlaşdırıldığı bildirilib. Bu məlumatlar hələlik rəsmi istintaqın yekun nəticəsi kimi təqdim edilməyib.
Xatırladaq ki, hadisə nəticəsində Dubay–Təl-Əviv marşrutu üzrə uçuş həyata keçirən “flydubai” aviaşirkətinin sərnişin təyyarəsi Səudiyyə Ərəbistanına enmişdi.
Bölmənin digər xəbərləri
