Rusiya Azərbaycanın antiinhisar pozuntuları ilə bağlı təklifini dəstəkləyib
Xankəndi, 29 oktyabr, AZƏRTAC
Azərbaycan dövlət satınalmaları və onların həyata keçirilməsi zamanı antiinhisar qanunvericiliyinin mümkün pozuntuları ilə bağlı məsələlərin nəzərdən keçirilməsini təklif edib.
AZƏRTAC-ın bölgə müxbiri xəbər verir ki, bunu Rusiyanın Federal Antiinhisar Xidməti rəhbərinin müavini Sergey Puzırevski MDB-yə üzv dövlətlərin Antiinhisar Siyasəti üzrə Dövlətlərarası Şurasının 61-ci iclası çərçivəsində bildirib.
O qeyd edib ki, Rusiya tərəfi bu təşəbbüsü dəstəkləyib və məsələ ilə bağlı birgə iş aparmaq niyyətindədir. Hazırkı mərhələdə əsas istiqamətlərin müəyyənləşdirilməsi nəzərdə tutulur. Bu istiqamətlərə satınalmalarda iştiraka icazə, onların keçirilmə şərtləri, həmçinin satınalma prosedurlarının iştirakçıları arasında mümkün kartel sövdələşmələri daxildir. Konkret aspektlər seçilərək növbəti görüşdə müzakirə olunacaq.
Sergey Puzırevski vurğulayıb ki, bu mövzu antiinhisar orqanları üçün aktualdır. Çünki məsələ rəqabətin məhdudlaşdırılması, əhəmiyyətli büdcə xərcləri və kiçik biznesin iri satınalma prosedurlarında iştirak imkanlarının təmin edilməsi ilə birbaşa bağlıdır.
Onun sözlərinə görə, bu istiqamət artıq iclasın protokolunda əksini tapıb. Növbəti görüşdə müvafiq məruzənin məzmunu və strukturu ilə bağlı konkret təkliflərin ətraflı nəzərdən keçirilməsi planlaşdırılır.
Müxbir - Tahir Ağaməmmədov
Bölmənin digər xəbərləri
