Avropa Komissiyası Macarıstanın 5,4 milyard avroluq müdafiə planını təsdiqləyib
Budapeşt, 29 oktyabr, AZƏRTAC
Avropa Komissiyası Macarıstanın müdafiə sahəsi ilə bağlı 5,4 milyard avroluq investisiya planını təsdiqləyib.
AZƏRTAC xəbər verir ki, plan Avropa İttifaqının (Aİ) 150 milyard avroluq SAFE (Avropa üçün Təhlükəsizlik Tədbiri) proqramı çərçivəsində hazırlanıb.
Komissiyanın sözçüsü Tomas Reqnye brifinqdə bildirib ki, Macarıstanın təklifi proqram üzrə təsdiq gözləyən sonuncu milli plan olub. Sənəd indi Aİ Şurasında üzv dövlətlər tərəfindən müzakirə olunmaq üçün təqdim ediləcək.
Reqnyenin sözlərinə görə, Macarıstanın planı təsdiqləndikdən sonra proqram üzrə 21 milyard avrodan bir qədər çox vəsait qalacaq. SAFE üzv ölkələrə müdafiə investisiyalarını və birgə satınalmaları maliyyələşdirmək üçün əlverişli uzunmüddətli kreditlər təqdim edir. Əvvəlcə Macarıstan üçün 16 milyard avro nəzərdə tutulmuşdu, lakin hökumət borclanmanı daha ehtiyatlı yanaşma ilə 5,4 milyard avroya endirib.
Macarıstanın müdafiə naziri Romulus Rusin-Sendi sentyabrda vurğulayıb ki, kreditlər geri ödəniləcək və ölkənin iqtisadi imkanları nəzərə alınmalıdır. İstifadə olunmamış vəsait üçün bu il yeni müraciət mərhələsi planlaşdırılır. Komissiya qalan vəsaitin bölüşdürülməsi ilə bağlı üzv dövlətlərlə sonradan əlaqə saxlayacaq.
Bölmənin digər xəbərləri
