Rusiya ordusunun hərbi və komanda məntəqələrinə hava zərbələri endirilib
Kiyev, 3 oktyabr, AZƏRTAC
Oktyabrın 3-nə keçən gecə Ukrayna Müdafiə Qüvvələri Rusiya ordusuna məxsus hücum dronlarının buraxılış məntəqəsinə, komanda məntəqəsinə və keçid məntəqəsinə zərbələr endirib.
AZƏRTAC Ukrayna Silahlı Qüvvələri Baş Qərargahının “Telegram” kanalına istinadla məlumat verir ki, Donetsk bölgəsində hücum dronlarının saxlanması, hazırlanması və buraxılış məntəqəsinə zərbə endirilib.
“Bu cür obyektlər prioritet hədəflər arasındadır. Sistematik məhvetmə Rusiya ordusunun Ukraynada mülki infrastrukturlara qarşı hücum dronlarından istifadə etmək qabiliyyətini azaltmaq məqsədi daşıyır”, - deyə Baş Qərargahın məlumatında qeyd edilib.
Bundan başqa Rusiya Federasiyasının Belqorod bölgəsindəki Novaya Tavoljanka yaxınlığında Ukrayna qüvvələri Rusiya ordusunun komanda məntəqəsinə, həmçinin Donetsk bölgəsindəki Novoşçevatoye yaxınlığında Mokri Yalı çayı üzərindəki keçid məntəqəsinə, eyni zamanda, Xerson bölgəsindəki Xromivka yaxınlığında Rusiya ordusuna məxsus təmir bazasına zərbələr endirilib.
Ukrayna qüvvələri Belqorod bölgəsindəki Voznesenivka yaxınlığında Rusiya hərbi logistikasına da hava hücumu edib.
Bölmənin digər xəbərləri
