Dövlət Turizm Agentliyinin sədri: Turizm hər kəs üçün bərabər imkanlar yaratmalıdır
Bakı, 27 oktyabr, AZƏRTAC
Turizm yalnız yeni məkanların kəşfi ilə məhdudlaşmır. O, həm də müxtəlif mədəniyyətlərə mənsub insanları bir araya gətirir, bərabər imkanların yaradılmasına, qarşılıqlı etimadın, anlaşmanın və hörmətin gücləndirilməsinə töhfə verir.
AZƏRTAC xəbər verir ki, bu fikirləri VII Ümumdünya Mədəniyyətlərarası Dialoq Forumu çərçivəsində təşkil olunan “Ortaq gələcək naminə turizm: inklüzivlik, bərabərlik və icma liderliyi sülhün qurulmasına necə töhfə verir?” adlı panel sessiyada Dövlət Turizm Agentliyinin sədri Fuad Nağıyev səsləndirib.
O qeyd edib ki, turizm imkanları hər kəs üçün eyni dərəcədə əlçatan deyil. Əlilliyi olan şəxslər səyahət zamanı müəyyən çətinliklərlə üzləşir, qadınların və yerli icmaların isə bu sektordan faydalanmaq imkanları bəzən məhdud olur. “Bu baxımdan səyahət imkanlarının daha əlçatan edilməsi, turizm sahəsində qadınların dəstəklənməsi və yerli icmaların turizm məkanlarının inkişafı ilə bağlı qərarların qəbulunda iştirakının gücləndirilməsi mühüm əhəmiyyət daşıyır. Turizmin daha inklüziv olması onun faydalarından daha çox insanın yararlanmasına, eləcə də daha güclü, ədalətli və sülhsevər cəmiyyətlərin formalaşmasına töhfə verə bilər”, – deyə F.Nağıyev vurğulayıb.
Bölmənin digər xəbərləri
