Türkiyə xarici işlər nazirinin müavini Məkkə Müdafiə Sazişini ölkə parlamentinə təqdim edib
Bakı, 27 oktyabr, AZƏRTAC
Türkiyə xarici işlər nazirinin müavini Levent Gümrükçü çərşənbə axşamı bildirib ki, Türkiyə, Səudiyyə Ərəbistanı və Pakistan arasında imzalanmış Məkkə Müdafiə Sazişi əməkdaşlıq və kollektiv müdafiə yolu ilə regional təhlükəsizliyi gücləndirməyi hədəfləyir.
AZƏRTAC “Anadolu” agentliyinə istinadla xəbər verir ki, Levent Gümrükçü Türkiyə parlamentinin Xarici işlər komitəsindəki çıxışında bildirib: “Məkkə Müdafiə Sazişi yalnız üç ölkə arasında xüsusi dostluq münasibətlərinin genişləndirilməsinin deyil, həm də regionumuzda getdikcə daha çox ehtiyac duyulan regional sahibliyin konkret məhsuludur”.
O, təklif olunan qanunvericilik üzrə müzakirələri davam etdirərkən sözügedən sənədi komitə və Türkiyə parlamenti tərəfindən təsdiq üçün təqdim edib.
Nazir müavini avqustun 7-də imzalanan sənəd üzrə Səudiyyə Ərəbistanı və Pakistanın daxili ratifikasiya prosedurlarını tamamladığını və tələb olunan rəsmi bildirişləri təqdim etdiyini bildirib.
Gümrükçü sazişin əməkdaşlıq və kollektiv müdafiəyə əsaslanan regional təhlükəsizlik çərçivəsinin yaradılması istiqamətində ilk addım olduğunu bildirib və əlavə edib ki, üç ölkə regiondan kənarda həll yolları gözləmək əvəzinə, regional problemlərin həlli üçün məsuliyyət daşımağı hədəfləyir.
O, çərçivənin qarşılıqlı etimada əsaslanan dialoq və əməkdaşlığı gücləndirməklə, habelə davamlı sabitliyi təşviq etməklə təkcə imza atan üç ölkənin təhlükəsizliyinə deyil, həm də daha geniş regionun təhlükəsizliyinə töhfə verməyi nəzərdə tutduğunu deyib.
Nazir müavini sazişin tamamilə müdafiə xarakterli olduğunu və heç bir ölkəni hədəf almadığını vurğulayıb. O, bu sənədin dövlət suverenliyi və ərazi bütövlüyü, özünümüdafiə istisna olmaqla, güc tətbiqinin qadağan edilməsi, mübahisələrin dinc yolla həlli, daxili işlərə müdaxilə etməmək prinsiplərini üstün tutan bütün regional ölkələr üçün açıq olduğunu deyib.
“Məkkə Sazişi regionda blok yaratmaqdan daha çox inteqrasiyanı nəzərdə tutur. BU sənəd bölücü deyil, inklüziv vizyonu əhatə edir”, - deyə o əlavə edib.
Bölmənin digər xəbərləri
