Azərbaycanın son illərdə beynəlxalq münasibətlər sistemində artan çəkisi təsadüfi proses deyil ŞƏRH
Bakı, 3 oktyabr, AZƏRTAC
Azərbaycanın son illərdə regional və beynəlxalq münasibətlər sistemində artan çəkisi təsadüfi proses deyil. Ölkənin enerji resursları, iqtisadi imkanları, əlverişli coğrafi mövqeyi, nəqliyyat-kommunikasiya layihələri və təhlükəsizlik sahəsində formalaşdırdığı imkanlar Azərbaycanın geosiyasi əhəmiyyətini yeni mərhələyə daşıyıb. Yeni Azərbaycan Partiyasının VIII Qurultayında səsləndirilən fikirlər də ölkənin qarşıdakı dövr üçün inkişaf prioritetlərini və regional mövqeyini anlamaq baxımından diqqət çəkir.
Bu sözləri AZƏRTAC-a açıqlamasında Milli Məclisin deputatı Nurlan Həsənov söyləyib.
O bildirib ki, Azərbaycanın beynəlxalq mövqeyinin möhkəmlənməsində enerji amilinin xüsusi rolu var. Avropanın enerji təhlükəsizliyinin gündəmdə olduğu bir şəraitdə Azərbaycanın enerji resurslarının ixracı ilə yanaşı, müxtəlif enerji marşrutlarının formalaşmasında iştirak etməsi ölkənin strateji əhəmiyyətini artırır. Bu baxımdan Azərbaycan yalnız enerji istehsalçısı və ixracatçısı kimi deyil, həm də regional enerji təhlükəsizliyinin mühüm iştirakçılarından biri kimi çıxış edir. Lakin Azərbaycanın artan rolunu yalnız enerji faktoru ilə izah etmək kifayət deyil. İqtisadi müstəqillik də xarici siyasətin həyata keçirilməsi üçün mühüm dayaqlardan biridir. Dayanıqlı iqtisadi baza ölkəyə müxtəlif dövlətlərlə qarşılıqlı maraqlara əsaslanan münasibətlər qurmaq, regional layihələrdə iştirak etmək və milli maraqlarını daha geniş imkanlarla müdafiə etmək şəraiti yaradır. Yəni iqtisadi potensial Azərbaycanın siyasi və diplomatik manevr imkanlarını genişləndirən əsas amillərdən biridir.
“Son illərin ən mühüm reallıqlarından biri isə Azərbaycanın ərazi bütövlüyünün və suverenliyinin tam bərpasıdır. Bu hadisə ölkənin siyasi tarixində yeni mərhələnin başlanğıcını şərtləndirib. Artıq əsas diqqət əldə olunmuş nəticələrin möhkəmləndirilməsinə, azad edilmiş ərazilərin bərpasına, dayanıqlı sülhün və regional sabitliyin təmin edilməsinə yönəlir. Bu mərhələ Azərbaycanın qarşısında həm yeni imkanlar, həm də yeni məsuliyyətlər yaradır.
Digər mühüm məqam Azərbaycanın nəqliyyat və kommunikasiya imkanlarının genişlənməsidir. Şərq-Qərb və Şimal-Cənub istiqamətlərində yerləşən ölkə kimi Azərbaycan regional bağlantıların inkişafında mühüm mövqeyə malikdir. Nəqliyyat dəhlizlərinin genişləndirilməsi yalnız iqtisadi dividendlər baxımından deyil, həm də ölkənin geosiyasi əhəmiyyətinin artması baxımından mühüm amildir.
Bununla yanaşı, Azərbaycanın regional siyasətində təhlükəsizlik amili də xüsusi yer tutur. Enerji və nəqliyyat infrastrukturlarının təhlükəsizliyi, regional sabitliyin qorunması və müxtəlif güc mərkəzləri ilə münasibətlərin balanslaşdırılması qarşıdakı dövrdə xarici siyasətin əsas çağırışları sırasında olacaq. Azərbaycanın artan regional rolu bu məsuliyyətlərin də paralel şəkildə artması deməkdir. Bütün bunlar göstərir ki, Azərbaycanın beynəlxalq sistemdə mövqeyi bir amilin deyil, bir-biri ilə əlaqəli çoxsaylı faktorların nəticəsidir", - deyə N.Həsənov vurğulanıb.
O əlavə edib ki, enerji resursları, iqtisadi potensial, təhlükəsizlik imkanları, nəqliyyat infrastrukturu, coğrafi mövqe və diplomatik fəallıq bir-birini tamamlayaraq ölkənin regional çəkisini formalaşdırır. Ona görə də Azərbaycanın qarşısında duran əsas məsələlərdən biri mövcud geosiyasi imkanları uzunmüddətli və dayanıqlı inkişaf modelinə çevirməkdir. Artan beynəlxalq əhəmiyyət ölkəyə yeni imkanlar açmaqla yanaşı, regional sabitliyin qorunması, strateji infrastrukturların təhlükəsizliyinin təmin edilməsi və müxtəlif tərəfdaşlarla münasibətlərin balanslaşdırılması kimi vəzifələri də aktuallaşdırır.
Bölmənin digər xəbərləri
